› 選擇地區
三藩市
紐約
洛杉磯
其他美國地區
香港 台灣 北美
 
2018年02月01日

鬥口響:限外援歸化名額仲實際 - 尊嘉

【今周主題:中超U23配額港超行得通?】
越南喺U23亞洲盃有驚喜演出,唔少聲音要求港足參考改革,甚至有人提出港超應參考中超嘅做法,規定至少兩名U23球員進入18人大軍名單,U23小將要正選上陣嘅做法。但筆者覺得,港超同中超最大唔同嘅地方,係港超存在大量外援同入籍兵,限制佢哋嘅名額仲實際!
目前港超除國內球會富力,非本地球員政策係「註六出四」,明顯同亞冠「註四出四」限額脫軌,仲存在大批歸化球員,如傑志早前8:1大勝東方嘅比賽入面,只有唐建文同李毅凱兩名土生土長球員踢正選;所以科蘭坦言加盟後,先知道傑志有好多外籍兵,同效力日聯大阪櫻花時唔同。反觀越南頂級聯賽雖冇類似中超嘅U23球員限制,但只可註冊兩名外援、一名歸化球員,變相本土球員上陣機會大增。
或會有人反駁,大減外援歸化名額令港超叫座力不足、球賽質素下降,但早前省港盃港隊派一眾年輕球員上陣,一樣踢得有聲有色,卓耀國(圖)更迅速爆紅;早前以年輕球員為主嘅越南球會河內FC,亞冠外作客傑志喺尾段僅敗,可以講明年輕球員一樣可以創出佳績。與其以大量歸化老將外援濫竽充數,倒不如只引入一兩位高質有叫座力球星,畀年輕人持續上陣進步,先至係港足出路。
文:尊嘉

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載