› 選擇地區
三藩市
紐約
洛杉磯
其他美國地區
香港 台灣 北美
 
2018年02月09日

求驗客手記:熱刺贏「波」抽好籤 - 求驗客

貴為英超球隊嘅熱刺,上月喺英足盃第四圈作客英乙嘅薯仔地,喺射手哈利卡尼擔正下,幾經辛苦先以1:1逼和低三個組別嘅紐波特郡,真係乜「飛士」都冇晒。周三重賽兼且喺領隊普捷天奴第200場領軍下,熱刺返到溫布萊個靚地即刻唔同晒,地面組織返晒嚟,輕鬆憑對手嘅烏龍波同拉美拿今季首個入波,主場2:0踢走紐軍晉身16強。

留力周六對阿奴

熱刺周六要喺英超上演北倫敦打吡,硬撼回勇嘅阿仙奴,所以呢場波多位主力如哈利卡尼、基斯甸艾歷臣都唔做正選,不過前線依然有洛蘭迪、孫興民同拉美拿領軍,仲有中堅艾達韋列特久休復出㖭!
紐波特郡嚟到溫布萊似乎唔多夠班,上半場26分鐘仲要慌失失「先開紀錄」,講緊嘅係紐軍左閘丹畢拿,面對穆沙施素高嘅右路地波傳中時,個波彈中自己右腳改變方向彈向球門,幫熱刺領先1:0。八分鐘後孫興民喺左路突破,傳畀禁區接應嘅拉美拿,後者離門六碼輕鬆射入,其後控制大局嘅熱刺留晒力再冇入波,以2:0贏波晉級。熱刺第五圈亦抽好籤(見附表),只係對英甲嘅羅奇代爾。

計埋今場,普領帶領熱刺嘅200場賽事贏咗110場,不敗率達78.5%,近12場主場更取得10勝兩和,表現咁硬淨未知阿仙奴領隊雲格周六嚟到會唔會驚呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載