› 選擇地區
三藩市
紐約
洛杉磯
其他美國地區
香港 台灣 北美
 
2018年03月02日

求驗客手記:VAR又做主角
熱刺照炒甲組仔

呢幾日歐洲冰天雪地,禮拜三嘅倫敦直情大雪紛飛,熱刺喺英足盃16強重賽鬥羅奇代爾,都喺大雪下進行,而呢場波熱刺靠洛蘭迪連中三元贏6:1晉級,不過又俾視像助理裁判(VAR)搶晒fo喇!

今場七分鐘,熱刺翼鋒拉美拿入波,但VAR話洛蘭迪犯規在先唔計,25分鐘VAR再發功補判熱刺12碼,孫興民主射雖然入咗,不過球證話佢起腳時用假動作而判射失,不過咁都要搵VAR確認先判,成個上半場嘅節奏就俾VAR打亂晒。熱刺上半場一度俾羅奇代爾追平,換邊後靠洛蘭迪入三粒,加埋孫興民同小將獲加彼德斯各入一球大勝6:1,領隊普捷天奴好嬲咁話:「比賽因為VAR令人好難集中精神,呢個系統扼殺咗足球嘅激情。」
呢場波仲有其他搞笑嘢,喺咁大雪嘅情形底下,球證泰安尼仲喺下半場一次罰球度,想用「消失的噴霧」嚟劃位,噴完當然係冇效果啦,盧卡斯莫拉同球證都對視笑咗。而且因應大雪,呢場波溫布萊原本劃定禁區線做藍色,但VAR系統可能因此辨別唔到,最後要加番小小白色做淺藍先開得波。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載