› 選擇地區
三藩市
紐約
洛杉磯
其他美國地區
香港 台灣 北美
 
2018年03月07日

求驗客手記:曼聯坐過山車反勝水兵
摩佬點鬥紅軍?

周一英超獨腳戲,曼聯先失兩球下靠尼曼查馬迪末段救主,作客3:2反勝水晶宮,不過紅魔表現認真唔掂,特別身價最高嘅保羅普巴同阿歷斯山齊士,前者繼續夢遊球場,後者更丟失控球權多達19次,俾利物浦名將加歷查狠批踢到好似小學雞咁,下禮拜日雙紅會點鬥如日方中嘅利物浦?

「普巴山神似小學雞」

開波11分鐘,曼聯就俾安祖斯唐辛一腳遠射,省中後衞域陀連迪路夫入網落後一粒;易邊後三分鐘曼聯再度失手,當時水晶宮喺左路獲得罰球隨即快開,成班紅魔後衞未有為意,結果主隊左閘雲安荷特長驅直進,殺入禁區射近柱收死紅魔門將迪基亞。落後兩粒嘅曼聯終於瞓醒,先憑中堅基斯史摩寧喺55分鐘頭槌破網追番一球;及後摩佬收起二閘,換入桑馬達同勞基梳爾,終喺76分鐘由盧卡古近射得手扳平2:2。眼見兩隊各得一分之際,馬迪91分鐘禁區頂遠射,射入加盟紅魔後首個入球,3:2反勝水晶宮,以62分力壓利物浦重上聯賽榜次席。
雖然紅魔落後兩球下奇蹟反勝,屬摩佬英超生涯首次。但紅魔對住有成十幾個傷兵嘅水晶宮都咁狼狽,兩名講波佬加利尼維利同加歷查都插魔兵,作為前紅魔隊長,加利佬喺半場時力數普巴:「普巴好似同隊友喺公園玩,拍緊一段ig短片咁,冇認真對待比賽,根本就係個笑話!難怪摩佬早排唔用佢。」加歷查就話:「我就覺得山齊士更加敗家,單單上半場已經甩波達19次,佢雖然係世界級球星,但我唔知佢喺場上踢緊乜。山齊士同普巴就好似小學雞一樣,係學校球場入面大叫我係最好嘅球員,我鍾意點踢就點踢。」

摩佬半場爆粗鬧番醒

摩佬賽後亦自爆,半場時激動得以大量粗口鬧醒班球員,更直斥「第二個失波可恥、幼稚」!唔知四日後英超主場鬥紅軍,會唔會仲係踢成咁呢?摩佬激動完都要搵番啲真銀慰藉,據報摩佬同俄羅斯電視台RT簽約,世盃期間兼職講波四日淨袋171萬鎊,日薪比起佢喺曼聯年薪除開多10倍!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載