› 選擇地區
三藩市
紐約
洛杉磯
其他美國地區
香港 台灣 北美
 
2018年03月28日

求驗客手記:國足對歐洲隊輸到怕
納比:我唔係神

國足喺今屆中國盃兩場失10球,令國內唔少球迷大失所望。

話題多多嘅中國盃禮拜一曲終人散,國足喺季軍戰以1:4不敵捷克,兩場輸晒失10球,老帥納比仲試到自己教波N年嚟嘅最大敗仗,連呢個前意大利嘅世盃冠軍教頭都話自己唔係神,唔可以點石成金,同納比同期嘅江蘇蘇寧名帥卡比路,禮拜一據報都已經唔撈,兩位意大利名帥喺中國都真係無符!
國足輸畀威爾斯同捷克後,俾國內球迷鬧到飛起,話中國足協明知球隊實力有限,仲要請實力比自己高咁多嘅球隊踢中國盃係自取其辱咁話。仲鬧埋教練納比唔應該兩場用兩隊唔同嘅陣容應戰,話咁樣根本唔能夠達至練兵效果。
納比話晒都叫「銀狐」,但佢領軍嘅中國隊近七場都未贏過,69歲嘅佢都話自己唔係神,國足仲有好多嘢需要改進,唔好以為佢帶過意大利贏世界盃,就等如帶國足可以即刻突飛猛進。據內地傳媒指,呢兩場大敗唔會影響納比嘅飯碗,中國足協依然屬意畀納比領軍至2022年。

跌出亞洲前五失種籽

另外,中國盃後有傳媒話納比𠵱家教國足嘅人工,有八成都係由佢嘅前東家廣州恒大代畀,所以今次中國盃點兵,佢就專登徵召多啲上海上港嘅球員,幫恒大消耗吓呢支國內最大競爭對手咁話,你睇納比幾慘,一陣用得多恒大兵又話佢偏私喎。
不過今次國足輸嘅唔單止係面子,事關喺今次國際賽期,亞洲第六嘅沙地阿拉伯賽和咗烏克蘭,令中國守唔住亞洲排名第五嘅席位,喺下年初嘅亞洲盃決賽周抽籤時,會遇到日本、南韓、澳洲、伊朗同沙地等呢五強。而且,有消息就指國足今次輸到驚,短期內都唔會再邀請歐洲隊友賽,講真,世界排名包艇嘅歐洲球隊直布羅陀,禮拜日主場友賽都贏咗拉脫維亞。

卡比路辭任蘇寧教練

而「銀狐」嘅意大利同鄉,江蘇蘇寧教練卡比路就要執包袱喇。據內媒話,卡比路已經向球會請辭,並且喺周一回國,成為今季中超第二位落台嘅教練。消息指卡比路今次離隊嘅主因並唔係球隊成績欠佳,而係佢同球會高層反咗面,最後雙方分手收場。不過,蘇寧上季請到卡比路嚟教,都只係排12位,今季三戰得一勝兩負,卡比路下台都唔出奇吖!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載