› 選擇地區
三藩市
紐約
洛杉磯
其他美國地區
香港 台灣 北美
 
2018年03月29日

趣趣地:伊巴返曼市 拍廣告咋!

瑞典前鋒伊巴謙莫域早前就正式同曼聯解約,仲宣佈會轉戰美職聯,加盟洛杉磯銀河。不過伊巴近日又偷偷地返咗曼徹斯特市,到底搞邊科?
原來伊巴今次返去曼市係為一間網上博彩公司拍廣告,個廣告都幾搞笑,伊巴喺片入面爆晒肌扮演一個類似「最後大佬」嘅角色士班(小圖),原本以為佢會同飾演挑戰者嘅大叔打起上嚟,點知鏡頭一轉,兩個人就換咗套家居服裝喺餐廳High Tea。
雖然個廣告好無厘頭,不過都落足本,製片商仲專登請咗個演員擔任伊巴嘅替身,以防呢位瑞典球星喺拍攝過程中受傷,都幾大陣丈。伊巴今次返曼市拍廣告都盡量保持低調,好多時都笠住頂帽以免畀人認出,不過又點會逃得出狗仔隊嘅法眼吖!拍完廣告之後,伊巴又要急急腳飛返去美國同球隊會合,銀河喺本周嘅聯賽將會硬撼同市球隊FC洛杉磯,預料伊巴到時有機會喺主場球迷面前亮相。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載