› 選擇地區
三藩市
紐約
洛杉磯
其他美國地區
香港 台灣 北美
 
2018年04月21日

【髮型民調】
馬尾巴治奧竟然算醜樣 碧咸粟米頭史上最強

英國《太陽報》最近做咗個球星髮型調查,由球迷票選足球史上最經典同最醜陋髮型,估唔到碧咸一向唔滿意嘅粟米頭,竟然成為最經典髮型,而前尼日利亞國腳韋斯特豎起兩個髻好似角嘅綠色辮子頭,就被選為最醜陋。

今次調查從全球揀選咗2000位球迷做調查,有英格蘭、德國、西班牙、法國、墨西哥、俄羅斯同意大利等地,到底2000人代表意義有幾大,就自己諗吓喇,但最後得出個結果就係咸哥贏,竟然有25%球迷選佢03年整嘅粟米頭為最經典,贏咗荷蘭名宿古列治嘅性感辮子頭同朗拿度02世盃嘅仙童頭。

不過咸哥之前受訪,曾經講過自己唔太喜歡呢個頭,亦曾經有人覺得係咸哥少數失敗嘅髮型,起碼佢自己都好快就轉咗個頭。

最核突球員髮型就由韋斯特奪下,但佢個奇特綠辮頭,亦可以話係佢令世人記得嘅標誌,同樣排第2嘅華達拉瑪亦一樣,唔係呢把金色掃把頭,點會有人封佢做金毛獅王?而意大利「馬尾神」巴治奧竟然都有11%人話佢個Mullet髮型核突,就真係有啲唔明呢班調查者嘅口味喇!

唔知遲啲過多10年,保羅普巴啲星星頭、豹紋頭仲有鬼五馬六唔同顏色嘅髮型,會進入經典定醜陋嘅category呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載