› 選擇地區
三藩市
紐約
洛杉磯
其他美國地區
香港 台灣 北美
 
2018年05月06日

求驗客手記:「爆頭門神」夠勇
勝利四奪冠軍創歷史

墨爾本勝利一報上屆決賽落敗之仇,再次捧走季後賽錦標,「爆頭門神」(20號)居功至偉。

澳職2017/18球季終於嚟到尾聲,上周六上演嘅季後賽總決賽,常規賽冠軍FC悉尼四強終於倒下,無法連續兩季威盡攞埋季後賽冠軍,叫有啲新鮮嘢畀球迷期待吓,結果淘汰悉尼嘅墨爾本勝利,憑巴巴路西斯一箭定江山,作客以1:0小勝完場前得10人應戰嘅常規賽阿二紐卡素噴射機,成歷史上首支四奪澳職季後賽錦標嘅球隊,但講到全隊最大功臣,應該係連傷兩次、個頭要用繃帶包完再包嘅門將羅倫斯湯馬士。

噴射機事隔10年後再入季後賽決賽,而當年擊敗中岸水手、歷史上僅捧過一次總冠軍嘅佢哋,當然期望藉主場之利一搔多年之癢,但論經驗,似乎及唔上近四季三入季後賽決賽嘅勝利,結果踢咗只係九分鐘,勝利就靠一次罰球攻勢,由佢哋次席射手之一嘅巴巴路西斯,接應隊友占士當拿治頭槌二傳,左腳射出彈地波省中企喺門前嘅敵衞古度姆比斯後,改變方向入網。雖然呢球波有少少爭議,因為助攻嘅占士當拿治似乎喺開出罰球一刻已經衝前咗,但用VAR就判定冇越位,宣佈入球有效,賽會暫時將入球歸於巴巴路西斯。

狂擋噴射機 惹對手領紅

落後一球嘅噴射機後尾有唔少攻勢可扳平,但敵軍門將羅倫斯湯馬士上咗身咁,上半場31分鐘就連續擋出拉利麥基爾嘅刁鑽射門同積臣荷夫曼近距離補射,而佢下半場近乎捨身成仁咁,一度踢傷個頭要用布包紮,完場前仲俾噴射機前鋒奧當路雲踢中塊面,對方當然紅牌被逐,但佢就連下巴都要包紮埋,傷到咁都係為幫球隊保住勝局,而勝利最後就以1:0小勝噴射機,補償上季喺決賽不敵FC悉尼嘅遺憾,繼2014/15球季後再度稱霸,亦超越FC悉尼同布里斯班獅吼,成為首支四奪澳職季後賽冠軍嘅球隊。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載