› 選擇地區
三藩市
紐約
洛杉磯
其他美國地區
香港 台灣 北美
 
2018年05月11日

求驗客手記:祖記意盃四連霸
艾基利贏到想入「廠」

周三晚場意大利盃決賽,祖雲達斯贏得超輕鬆,以4:0大勝AC米蘭,連續四季稱霸呢項國內盃賽,加上到周日大有可能會成功鎖定埋意甲七連霸,又做本土雙冠王,唔怪得成日傳教練艾基利可能今夏會被阿仙奴撬走,皆因真係喺自己國內贏到悶,而英媒最新消息,就話佢成為兵工廠新帥候選人名單中嘅大熱。

AC廢龍派膠吞四蛋

講番場意盃決賽先,其實祖雲達斯可以大勝一場,真係要多謝AC門將基安盧基當拿隆馬連番送禮。兩隊上半場踢成0:0,但換邊後去到56分鐘,祖記終靠中堅貝拿迪亞頭槌建功開紀錄,之後當拿隆馬就突然因失咗一球後慌晒,先係61分鐘處理杜格拉斯哥斯達嘅禁區頂勁射,將皮球擋入自己龍;三分鐘後又再犯錯,接唔實文迪蘇傑嘅頭槌攻門,令貝拿迪亞門前補中梅開二度,去到76分鐘,自己友都玩埋佢一份,卡連歷防守角球嗰陣變擺烏龍,令祖記輕鬆贏四蛋捧盃,呢個賽果亦係繼拿玻里喺1976年以同樣比數擊敗維羅納、賽事42年嚟嘅決賽最大勝差。
教練艾基利就咁成為史上首位連贏四屆意盃嘅主帥,而球隊喺意甲亦叫糊中,周日只要作客羅馬攞多一分,又可以完成七連霸偉業,即代表艾基利2014年接替干地任教後,國內兩大重要錦標年年歸佢。祖記喺意甲獨大,真係冇球隊可以頂得住,好似今季拿玻里一路霸佔聯賽榜首,最後都因自己唔穩將冠軍讓番畀祖記。

艾基利成新廠長大熱

近期艾基利嘅下一站,傳得最熱嘅就係季尾會送走雲格嘅阿仙奴。英媒周四話兵工廠已縮減選帥範圍至五個人身上,分別就係艾基利、安歷基、路維、韋拉同阿迪達。艾基利比安歷基嘅人工平,又可以早過路維答到兵工廠接唔接手,唔使等世盃後先落實,而帶隊經驗就勝過韋拉同阿迪達,所以捧完意盃後突然變搶手,但入「廠」唯一唔好處,就係想破之前兩次歐聯做二奶嘅宿命,唔知又要等幾耐!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載