› 選擇地區
三藩市
紐約
洛杉磯
其他美國地區
香港 台灣 北美
 
2018年05月18日

求驗客手記:為馬體會奪首冠
王子完美告別

周三上演嘅歐霸盃決賽,馬德里體育會同馬賽喺法國里昂爭逐冠軍,靠當家射手基沙文梅開二度,以3:0擊敗對手,九年內第三次奪得歐霸盃。

而今次捧盃,將會係季後離隊嘅老將費蘭度托利斯,最後一次兼第一次為馬體會贏重要錦標。至於對家球星皮耶就慘,中咗「賽前摸盃」魔咒,屈居亞軍之餘仲傷埋。

基沙文唔否認離隊

比賽初段,佔有半個主場優勢嘅馬賽佔盡主動,不過未能先開紀錄下,更喺21分鐘送大禮,門將文丹達交波畀防中森保安古沙,可惜後者甩腳,仲被馬體會中場基比截到,立即送前畀基沙文單刀輕鬆射入。馬體會領先後得勢不饒人,再喺換邊後四分鐘靠基沙文再入一粒,加上隊長基比臨完場前埋齋,最終以3:0大勝奪冠。
賽後焦點落喺兩位馬體會前鋒身上,梅開二度嘅基沙文,盛傳會喺季後走人,佢賽後話:「我14歲已經離開家鄉,為嘅就係呢一刻,我一定會同家人慶祝。」而施蒙尼賽後都開腔希望基沙文會留隊,但呢位法國前鋒就話家吓唔係傾前途問題嘅時間,擺明畀檸檬施蒙尼食咁喎。

皮耶手多摸盃中咒

而比賽最後階段先上陣嘅老將費托,終於成功代表母會捧起獎盃。01年喺馬體會出道嘅王子,過去只喺01/02球季代表球隊贏過西乙冠軍,離離合合,王子再次為母會贏得獎盃,而且仲係最後一次:「今次捧盃嘅心情比起過去任何一次都興奮,因為係代表我嘅母會,而且大家都知我季尾就離隊,所以係完美嘅告別。」而被記者問起未來去向時,王子都冇回應,睇嚟費托迷要再等等。
而對手馬賽方面,今場有隊長皮耶復出,不過呢位隊長就手多多,賽前俾鏡頭拍到佢掂咗獎盃一下,果然係好唔「老利」!球隊輸波不突止,佢自己都踢咗半個鐘到就傷出,都唔知會唔會影響踢世盃。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載