› 選擇地區
三藩市
紐約
洛杉磯
其他美國地區
香港 台灣 北美
 
2018年05月29日

趣趣地:兩度派膠球迷網上發炮
卡利奧斯收死亡帖

利物浦門將卡利奧斯喺上個禮拜六嘅歐聯決賽兩度派膠,連累球隊以1:3輸畀皇家馬德里。賽後有部份激進球迷喺網上向卡利奧斯發死亡威脅,揚言要殺死佢同埋佢嘅屋企人,甚至詛咒卡利奧斯「你應該死於癌症」。有見事態嚴重,默西塞德郡警方已介入調查,「默郡警方想提醒社交媒體用戶,喺網上發表冒犯性言論包括惡毒留言以及恐嚇行為,都會受到調查。」

米洛列特:好難安慰佢

雖然比賽已經完咗,但卡利奧斯嘅心情仲未平服,賽後喺球場痛哭兼做手勢向球迷道歉嘅佢,禮拜日再喺Instagram同Twitter等社交媒體發文闡述自己喺決賽後嘅心情,又再一次同球迷、隊友、職員道歉。
佢喺行文入面提到「直到呢一刻為止,我都冇瞓過好覺,當時嘅畫面仍喺我腦海入面不斷浮現。我對唔住隊友、球迷同埋職員,我知道自己犯嗰兩個錯,搞禍咗成件事,更令所有人失望。」

紅軍或買羅馬門神頂替

卡利奧斯又多謝去基輔撐場嘅紅軍球迷,「我唔會當呢啲係應得嘅,佢哋再一次反映,紅軍係一個團結嘅大家庭。我哋將來會以更強嘅姿態回歸!」隊友洛夫雲、沙迪奧文尼,以至前紅軍球員盧卡斯亦有留言勉勵卡利奧斯。
隊友米洛列特亦都話,旁人好難安慰卡利奧斯,仲用自身經歷勉勵對方:「所有門將都理解佢嘅情況,我之前都遇過同樣情況,每個門將會試過,旁人係好難安慰佢嘅。」
喺決賽犯呢啲低級錯誤,睇嚟卡利奧斯都好難企得返起身,有報道話高路普已準備出手收購新門將。英國《衞報》就話紅軍打算重啟收購羅馬門將艾利臣比加嘅計劃,但由於羅馬上年以「超值價」放走穆罕默德沙拿,所以今次可能會向紅軍開天殺價。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載