蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月13日

求驗客手記:紅魔8‧5踩拜仁「新」場
迪基亞上艦冇份?

7,939

球季啱啱完,世盃都未開始,不過大部份球隊已排好晒新球季嘅季前熱身賽程,曼聯八月五號會喺「新安聯球場」作客拜仁慕尼黑。點解叫新?事關慕尼黑1860新季會搬離呢個場,拜仁獨霸球場後將佢油成全新紅白色嘅塗鴉圖案,球迷到時就會知真身係點,不過曼聯門神迪基亞又放風話世盃後未必留隊噃!
拜仁新帥尼高高華會喺下月一號正式履新,球隊將會喺七月國際冠軍盃出戰,21號喺奧地利鬥巴黎聖日耳門、25號去到美國費城對祖雲達斯,28號去邁阿密友賽曼城,然後返德國,八月五號對紅魔。拜仁就稱呢場友賽會喺「新安聯」踢,事關同市宿敵1860慕尼黑新季會遷出安聯,拜仁將安聯嘅觀眾席用上球迷嘅設計佳作做塗鴉,肯定會令人耳目一新咁話。

傳皇馬斟介波亞斯

曼聯都會去美國踢足五場國冠盃,分別會對CF阿美利加、聖荷西地震、AC米蘭、利物浦同皇家馬德里,然後就飛去慕尼黑對拜仁,不過到時西班牙國門迪基亞就唔知仲喺唔喺度喇。話說皇馬多年嚟一直都吼實迪基亞,仲吹過話之前施丹劈炮唔撈,都係同會長佩雷斯係都要買迪基亞而唔肯簽夏薩特有關。近日迪基亞被問到會唔會轉會皇馬,佢就不置可否喇:「我嘅未來?世盃係我家陣最關心嘅事,球壇中可能發生嘅事實在太多,我能夠做嘅係冷靜面對。」皇馬嗰邊暫時未有教練,《馬卡報》就講話皇馬正同前車路士領隊波亞斯傾緊,睇吓佢有冇興趣上「艦」咁話!

紅魔新兵未踢就傷

迪基亞兩年前喺歐國盃期間,曾經同一宗性侵案扯上關係,現任西班牙首相佩特羅當時仲公開表示唔歡迎迪基亞為國家隊上陣。不過隨住指控因缺乏證據未能成立,佩特羅近日亦私下向迪基亞道歉,不過呢位27歲曼聯門將仲話希望首相公開道歉。
另外,曼聯上個禮拜三喺波圖簽入嘅19歲後衞達洛特,佢禮拜日被拍到撐住拐杖到奧脫福睇慈善賽。原來呢位新紅魔上季尾已經因膝傷錯過咗幾場波,不過曼聯就預計佢可以趕得切參加季前嘅美國之旅。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載