› 選擇地區
三藩市
紐約
洛杉磯
其他美國地區
香港 台灣 北美
 
2018年06月16日

世盃求驗客:飛上枝頭去皇馬
盧帥鬧爆狂牛主席 - 求驗客

皇家馬德里喺世盃開波前公佈搵嚟西班牙教練盧比迪古接手,結果激嬲西班牙足總仲陣前易帥,搞到盧比迪古可以好得閒咁喺禮拜四出席皇馬記招。呢位新科皇馬教練就寸足總主席盧比艾利斯口是心非,皇馬會長佩雷斯就力撐自己友,鬧足總無理解僱咁話。
51歲嘅盧比迪古飛上枝頭去皇馬簽約三年,舉完皇馬波衫後,喺記者會上直情眼濕濕,佢話自己唔後悔提早公佈成為皇馬新帥呢個決定,但就好傷心冇得帶西班牙踢世盃:「嗰日係自從我阿媽過身以嚟,生命中最難過嘅一天,但今日就係我生命中最開心嘅一日。我深信我同皇馬所做嘅一切係誠實同清晰,我會畀時間盧比艾利斯改變佢嘅回應。」之後仲鬧盧比艾利斯講一套做一套,相當虛偽:「佢親切咁恭喜我成為皇馬教練,但之後……我都唔知喇!如果佢用另一種方法處理呢件事,我會比較喜歡佢。」

借雲高爾干地過橋

「老佛爺」佩雷斯就唔明西班牙足總點解咁大反應:「我哋係合法同自由咁簽署呢項協議,唔知點解會畀人話唔忠誠。主席嘅回應直情係前所未見,冇任何理由解釋盧比迪古點解唔適合帶領西班牙出戰世盃。」佩雷斯仲以荷蘭前主帥雲高爾喺上屆世盃前承諾之後教曼聯,以及喺上屆歐國盃帶領意大利嘅干地,都係提早公佈新球季轉去教車路士呢兩個例子,嚟解釋盧比迪古教皇馬冇錯。
佩雷斯仲理直氣壯話係西班牙足總錯晒:「我哋本來想等西班牙贏完世盃先介紹盧比迪古,早啲通知大眾只係想展示透明度同埋避免外界揣測,但西班牙足總嘅反應就荒唐怪誕,死要面子咁啦,連皇馬形象都傷害埋。」但講到尾,盧比迪古五月底先至同西班牙足總續約兩年,個案同雲高爾、干地一早講明大賽後唔撈唔同。

傳斟掂鋼門艾利臣

另外據西媒報道,皇馬已經同巴西一號龍門艾利臣比加達成個人條款並協議簽約五年,只係差同羅馬傾掂轉會費。聽講羅馬開價7,000萬歐元,同皇馬個價相差大概1,800萬歐元。

Now TV每日只需$6*,
全年睇盡猛片,新劇,世界盃
即刻撳下面登記優惠或致電2888 1888(後按2)申請啦!
https://bit.ly/2JqDJKw
*優惠期有限,受條款及條件約束。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載