› 選擇地區
三藩市
紐約
洛杉磯
其他美國地區
香港 台灣 北美
 
2018年06月18日

世盃求驗客:違禁煙令又涉歧視
老馬睇波一身蟻 - 求驗客

阿根廷喺上周六世盃D組首輪落筆打三更,有美斯射失12碼下俾冰島逼和1:1,而且入場睇波嘅名宿馬勒當拿搞出大頭佛咁,首先佢就俾人影到無視球場嘅禁煙令,喺觀眾席戴住黑超隊雪茄,然後仲要俾人話佢無啦啦對南韓球迷做出帶有種族歧視性嘅「拉眼角」動作。不過,「老馬」就喺ig解釋,話唔知球場禁煙同埋冇歧視任何人呀!
57歲嘅老馬,喺1986年靠一扭六金球同埋上帝之手,幫阿根廷贏到世盃之後,祖國到𠵱家都未嘗世盃冠軍滋味,老馬自己都試過用教練身份領軍出戰2010年世盃,最後八強俾德國大炒四球出局。一向愛國嘅老馬,對於今屆國家隊成績都好緊張,第一輪已經嚟到斯巴達球場睇波,點知無啦啦因為兩單醜聞做咗焦點。

辯稱唔知場內禁煙

除咗違例吸煙之外,ITV主持兼體育記者Jacqui Oatley喺Twitter指摘馬勒當拿向南韓球迷做「拉眼角」動作,相當有種族歧視成份,搞到一向我行我素嘅老馬喺ig先解釋番食煙問題:「今日對阿根廷人係艱難嘅一日,喺世界盃踢第一場比賽會好緊張,每個人都有自己嘅感受。我真係唔知道球場內係唔准食煙,我要向所有人同埋組織者道歉。嚟啦阿根廷,一齊支持我哋嘅球員,比以往更加支持!」

寸記者造新聞

然後,老馬再寸番記者借佢嚟造新聞:「我比其他人更加明白,喺世盃期間個個都會喺任何地方搵新聞,但我想澄清今日喺球場內,喺眾多熱情嘅球迷當中,我對一個喺人群中向我哋拍攝嘅球迷留下深刻印象,佢係一位着阿根廷Tee嘅亞洲男孩。喺遠處嘅我,嘗試令佢哋知道,就算係亞洲球迷都為我哋歡呼嘅感覺係幾咁好。各位,事實就係咁。」
老馬解釋完,件事唔知仲有冇餘波,不過呢位一代球王咁多年嚟負面新聞多多,由80年代到2004年都有食可卡因嘅習慣,就算踢緊巴塞隆拿同拿玻里嗰陣都係,04年體重一度去到127公斤嘅癡肥級別,之後先開始減肥,09年又俾意大利追佢成3,700萬歐元逃稅等,總之就係麻煩友啦。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載