› 選擇地區
三藩市
紐約
洛杉磯
其他美國地區
香港 台灣 北美
 
2018年06月30日

世盃求驗客:賀贊奴沙 省中柱反彈食波餅
笑死「亞姨」 - 求驗客

周四世盃上演分組賽最後四場比賽,唔知係咪球員們覺得前日嘅比賽戰情過於平淡,所以要搞搞新意,出現兩幕非常諧趣嘅畫面。首先頭場H組最後一輪比賽,塞內加爾0:1輸畀哥倫比亞,最終以第三名出局。但塞軍失嘅一球,嚟自哥倫比亞一次角球攻勢,從慢鏡睇到,原本守近柱嘅塞軍「5號仔」伊祖沙古爾,入球前後都處於淡定狀態,就好似最近嘅觀眾欣賞入球,俾人鬧之餘,亦有陰謀論推測佢哋有蠱惑。

塞軍古爾挨柱防守

當時負責守柱嘅球員嘅係效力愛華頓嘅伊祖沙古爾,不過佢成個人就好似香港人搭港鐵挨住條柱咁,完全唔似係踢緊波,甚至到哥倫比亞守衞耶利文拿頭槌攻門,個波去到佢負責嘅範圍,呢位「港鐵乘客」都冇意識伸腳攔截,任得門將卡甸尼戴耶飛撲,最後梗係失波。雖然佢出腳都未必救得番,但今時今日咁嘅防守態度就抵鬧喇!

巴舒亞伊突變樑仔

而尾場G場賽事,比利時對英格蘭嘅比賽,本來最搶眼嘅係前曼聯球員贊奴沙,因為佢51分鐘射入靚波帶領球隊以一球力克英格蘭,得以首名出線。點不知,佢嘅風頭俾今場代替盧卡古打正選嘅巴舒亞伊搶晒。話說贊奴沙入波後,「亞姨」就走到去龍門,準備執起個波再大腳抽入龍門慶祝。點知佢獨特嘅慶祝方式,一抽之下中門柱嘅內柱,變成回力鏢咁反彈去「亞姨」塊面到,上演一幕《足球小將》樑仔式嘅「顏面擋波」。佢食咗一下波餅當然就痛痛豬喇,之後仲有不斷用手捽省得最應嘅左眼㖭。
不出意外,呢一幕令「亞姨」隨即成為網上焦點,唔少網民仲話呢球係「賽事最佳金球」,仲好衰咁話要求遊戲廠商喺嚟緊出嘅足球遊戲,幫巴舒亞伊加番呢個慶祝方式。其實上場對突尼西亞「亞姨」後備入替,不過多次埋門都入得一球已被網民恥笑,希望「亞姨」可以喺淘汰賽爭番啖氣啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載