› 選擇地區
三藩市
紐約
洛杉磯
其他美國地區
香港 台灣 北美
 
2018年08月10日

求驗客手記:缺席天津操練恨離中超
莫迪斯迪跟韋素跳船

天津權健上季先由中甲升上中超,喺球會高層肯大搞揼水之下,簽入咗韋素、柏圖、莫迪斯迪呢三位星級外援,今年仲靠佢哋殺入亞冠盃八強。喺呢啲咁關鍵嘅時刻,權健將韋素賣咗去多蒙特,而莫迪斯迪仲疑似玩失蹤嗌走,一下子兩大外援「跳船」,權健認真頭痕!

收少近億想解約去俄超

權健上年由科隆引入莫迪斯迪,呢位法國前鋒亦都無令人失望,聯賽短短上陣八場就轟入七球,仲有三個助攻,係球會攞到聯賽季軍嘅一大功臣。不過法國《隊報》就話,莫迪斯迪想離隊搵新挑戰,仲想同權健提早解約,轉投俄超球隊莫斯科火車頭。莫迪斯迪嘅經理人亦都證實,雖然仲未收到火車頭嘅正式報價,但莫迪斯迪本人傾向走人。
中國傳媒就話,莫迪斯迪自從禮拜二開始就無參加操練,而權健就證實佢係以私人理由請假,令離隊嘅傳聞甚囂塵上。莫迪斯迪份約到2020年先完,不過佢已經委託律師團隊同權健傾有關解約嘅事,仲想追番1,000萬歐元嘅薪酬差距。原來莫迪斯迪𠵱家份約係同權健嘅前任高層簽落嘅,同權健𠵱家拎住嗰份唔同,所以就有薪酬差距,意味莫迪斯迪收少咗1,000萬歐元。佢就想用呢個理由同權健解約。
其實權健今年嘅表現唔算好好,聯賽𠵱家都只係能夠排喺第九位,下季隨時冇得打亞冠。雖然柏圖今季繼續有出色表現,但如果冇韋素同莫迪斯迪,球隊話唔定亞冠八強出局。

告魯夫囝囝教重慶斯威

有人走都走唔切,但另一支中超球隊重慶斯威喺周三就宣佈覓得新帥,就係荷蘭傳奇告魯夫之子佐迪告魯夫。佐迪同老竇嘅成就差得遠,球員時代踢過巴塞同曼聯,但表現好一般,上年就擔任以色列球隊特拉維夫馬卡比嘅教練。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載