› 選擇地區
三藩市
紐約
洛杉磯
其他美國地區
香港 台灣 北美
 
2018年08月23日

求驗客手記:
阿根廷新帥史卡朗尼爆料
美斯唔想踢 - 求驗客

阿根廷喺今夏世盃決賽周表現認真麻麻,分組賽幾乎出局,雖然最後死裏逃生晉級16強,但對住應屆冠軍法國都要輸波出局,決賽周後國家隊暫時由少帥史卡朗尼接任。再次喺國家隊爭標失敗,球王美斯自然好失望,唔知係咪已經意興闌珊,之前已經主動要求缺席下月兩場友賽,史卡朗尼日前接受訪問時仲透露,唔知美斯幾時會重返國家隊,唔通球王從此同阿根廷講ByeBye?
世盃之後,阿根廷教練森柏奧利離任,由暫代教練史卡朗尼臨時領軍,同樣係前阿根廷國腳艾馬做副手。馬斯真蘭奴同碧基兩名老將宣佈退出國家隊,至於美斯就宣佈無限期暫停代表阿根廷比賽,大家擔心已經31歲嘅美斯一路喺阿根廷都贏唔到重要錦標,會唔會索性結束埋國家隊生涯。

點兵揀新人大換血

史卡朗尼喺周二接受訪問嘅時候,被問及美斯嘅國家隊生涯係咪已經結束,史卡朗尼話:「我喺公佈九月國家隊大軍名單之前同美斯傾過,之後佢就冇喺未來兩場比賽嘅名單上出現。老實講,之後我哋冇再講過未來會有乜嘢計劃,之後佢會唔會再入選國家隊,惟有拭目以待。其他球員都好樂意為阿根廷效力,大家都以國家隊利益為大前提,呢點我好滿意。」
美斯喺2016年連續第二年喺美洲國家盃決賽落敗之後,曾經宣佈過要退出國家隊,之後回心轉意。阿根廷將會喺9月7同11日友賽危地馬拉同埋哥倫比亞,史卡朗尼首次點兵冇美斯之餘,亦揀咗唔少新面孔,29人名單裏面,有成12人係從未代表過國家隊上陣。

同阿蘇攜眷出海玩

美斯暫別阿根廷,暫時一心一意為巴塞隆拿效力,人都輕鬆啲,喺上周六新球季首場西甲3:0大勝艾拉維斯之後,就同隊友兼老死蘇亞雷斯,一齊帶埋另一半出海玩。美斯同老婆安東莉娜,加埋阿蘇同另一半蘇菲亞,四個老友鬼鬼,除咗周時一齊去玩,安東莉娜同蘇菲亞仲有生意夥伴關係,一齊合作開鞋店。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載