› 選擇地區
三藩市
紐約
洛杉磯
其他美國地區
香港 台灣 北美
 
2018年09月19日

求驗客手記:同性感名模剪綵唔衰得
基奧特暗寸莫拉達

車路士過去一年嘅表現好似個鐘咁兜咗一大個圈,由上年攞英超冠軍,到上季表現沉到連歐聯席位都保唔住,今季又無端端開季五連勝,搵佢哋班球員代言鐘錶就真係啱晒。唔知基奧特會唔會獲贈隻名錶,但佢唔使睇錶都肯定好等得,佢話唔介意目前被艾華路莫拉達搶走正選位,會耐心等機會。

失正選因踢世盃遲歸隊

近日有間名錶公司喺倫敦開設新嘅旗艦店,請咗大衛雷斯、基奧特、巴克利同馬高斯阿朗素一班車路士球星嚟剪綵,仲有着得好性感嘅荷蘭名模Lara Stone㖭。講番班球員,自從沙利上任之後佢哋即刻脫胎換骨,就連上季俾人鬧爆嘅艾華路莫拉達都搶番正選。不過「銀河唯一」基奧特就被貶做後備喇,話晒都係世界盃冠軍隊嘅正選前鋒,輸畀個連世界盃都冇份踢嘅隊友好冇面喎!

沙利遭「方丈」鬧爆

成世盃冠軍功臣嘅基奧特就咁話:「我同莫拉達之間係公平競爭,因為我夏天要參加世界盃遲咗歸隊,所以仲未回復最佳狀態;莫拉達由季前熱身賽開始已經係正選,畀佢擔正亦理所當然,加上領隊話唔想喺季初有大變動,所以我會耐心等機會。」
𠵱家車路士更衣室咁和諧,睇嚟領隊沙利嘅個人魅力都唔差,不過佢嘅舊東家拿玻里嘅會長迪羅倫迪斯就唔係咁睇,雖然沙利跳槽都已經係幾個月前嘅事,不過迪羅倫迪斯仲係耿耿於懷,近日繼續向對方開火:「今次請安察洛堤執教令我安心得多,沙利無疑教得好好,但佢一生中亦經歷咗唔少敗仗,而且佢經常都俾人炒魷魚。佢係個好固執嘅人,一個人嘅人際關係多少亦反映佢嘅人生經歷。」唔知迪羅倫迪斯呢位「方丈」仲要嬲到幾時呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載