› 選擇地區
三藩市
紐約
洛杉磯
其他美國地區
香港 台灣 北美
 
2018年09月27日

求驗客手記:最差11人「燒山」都有份

國際足協周一就公佈咗年度最佳11人,西班牙馬卡報都唔執輸選出咗年度最差11人,當中就梗係唔少得今年初轉投曼聯之後畀人鬧到飛起嘅阿歷斯山齊士,同埋喺球會國家隊都冇表現嘅奧斯爾啦。
先講後衞,唯一入選嘅英超兵就係曼聯嘅域陀連迪路夫嘞,呢位瑞典中堅喺上年加盟曼聯,原本都被寄予厚望,點知佢嘅防守能力就認真平庸,仲成日有「蝦碌」鏡頭。佢嘅隊友艾歷拜利上季又傷多過踢,所以領隊摩連奴明知連迪路夫唔掂都焗住用佢,效果相當強差人意。

另外兩位最差後衞就係兩位意甲兵,分別係邦路斯同埋賀維迪斯。邦路斯上季由祖雲達斯轉投AC米蘭之後,未能夠擔任「大哥」嘅角色統領後防,球隊嘅防守可以話係毫無起色,庸碌咗一季,今季季前回歸祖記,同基亞連尼一班老拍檔再合作。至於上季由史浩克04外借去祖記嘅賀維迪斯就傷多過踢,全季只係上陣咗248分鐘,似做文員多過球員囉。
至於最差中場,阿仙奴嘅「奧燒」上季無論喺球會定國家隊都勁沉,肯定有份入選。另一位就係上季以4,000萬鎊轉會費加盟車路士嘅泰莫爾巴卡約高,呢位法國中場上季上陣機會都唔少,不過始終踢唔出表現,今季仲俾車仔借咗去AC米蘭。前荷蘭國腳史奈達上季喺尼斯踢得八場波,一樣有份入選;至於曾經被視為係巴西新希望嘅中場甘素轉戰歐洲之後亦都係踢唔掂,上季只係為西維爾上陣過11次,今季同樣要走人。
輪到前鋒喇,除咗山齊士之外,尼日利亞前鋒伊恩拿祖之前喺曼城踢唔掂,上季去到李斯特城亦都麻麻地,喺英超只係入得三球;另一位入選嘅係馬德里體育會嘅過氣新星韋圖,今季佢已經連續第三季俾球會外借,如果今季佢喺富咸再踢唔出成績,莫講話入選最差11人,隨時連份工都冇埋呀。

卡利奧斯一場斷送前程

至於最後門將位置,應該唔使多講,都係利物浦門將卡利奧斯嘞,雖然呢位德國門將上季表現一直都不過不失,不過上屆歐聯決賽一場波出現咗兩次致命失誤,唔單止令紅軍斷送咗冠軍,就連佢自己嘅職業生涯都斷送咗大半,今季佢就俾球會外借咗去比錫達斯喇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載