› 選擇地區
三藩市
紐約
洛杉磯
其他美國地區
香港 台灣 北美
 
2018年10月22日

求驗客手記:巴塞上榜首 美斯險斷手唞三周
國家打吡 球王去那兒? - 求驗客

上星期六西甲榜首大戰,巴塞隆拿主場以4:2擊敗西維爾,成功重登榜首。不過呢場贏波嘅代價就認真大,因為主將美斯喺26分鐘因傷退下火線,事後證實係右臂骨裂,要唞三星期,所以下星期日西甲對皇馬嘅國家打吡一定冇佢份,而嚟緊呢場國家打吡就成為2007以嚟,首次既冇基斯坦奴朗拿度(C朗),又冇美斯嘅El Cl咲sico。

11年嚟首缺兩球王

上星期六西甲,皇馬同馬體會齊失分,所以巴塞同西維爾邊隊贏,都可以壓過艾拉維斯上榜首。主場出戰嘅巴塞相當積極,開波僅兩分鐘就由菲臘比古天奴接應美斯助攻先開紀錄。10分鐘後,美斯接應好拍檔蘇亞雷斯嘅傳送射成2:0。不過五分鐘後,美斯同西維爾中場法蘭高華斯基斯爭波倒地,右臂受傷隨即退下火線。雖然之後西維爾靠基文迪朗格勒擺烏龍,同埋路爾斯梅利爾補時入波,但蘇亞雷斯同拿傑迪錫各建一功,最終巴塞贏4:2。

賽後美斯經檢查,證實係右臂橈骨骨裂,官方聲明話起碼要唞三星期。即係話呢位巴塞10號仔將會缺席嚟緊歐聯兩戰國際米蘭,同埋下星期上演嘅西班牙國家打吡。另外,隨住宿敵C朗季前離開皇馬轉投祖雲達斯,下星期呢場國家打吡,係近11年嚟首次唔見兩大球王。對上一次,已經係2007年12月皇馬作客魯營以1:0小勝對方,當時年僅20歲嘅美斯因傷缺陣,而22歲嘅C朗仲喺曼聯。

盧比迪古輸打吡即炒

另一邊廂,皇馬亦深陷低潮,上星期六對利雲特雖然打破長達481分鐘嘅入球荒,不過最後都以1:2主場輸畀利雲特,五場不勝。雖然教練盧比迪古賽後就話唔擔心被炒,不過有傳媒報道,指皇馬主席佩雷斯喺賽後去咗更衣室同球員訓話,而且情緒非常激動。

另外亦有消息話,「老佛爺」私下同盧比迪古閉門密斟。不過無論點樣,消息人士話今個星期對柏辛域陀尼亞嘅歐聯分組賽,同埋下星期嘅國家打吡都非常重要。假如兩場比賽皇馬都贏唔到,估計盧比迪古嘅烏紗就會不保。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載