› 選擇地區
三藩市
紐約
洛杉磯
其他美國地區
香港 台灣 北美
 
2018年11月14日

求驗客手記:年初涉放料去西布朗遭起訴
史獨隨時停終身

利物浦前鋒史杜列治今季英超上陣七次入兩球,表現先啱啱叫有啲起色,不過星期一竟然因為涉嫌違反賭博條例,被英格蘭足總經過八個月調查之後起訴,球員生涯隨時毀於一旦。事緣佢喺今年一月借去西布朗前,涉嫌放料畀有關人士落重注,最嚴重可能面臨令佢收山嘅長期停賽處分。

英足總星期一宣佈,經過長達八個月嘅調查後,認為29歲嘅史獨涉嫌喺今年一月借去西布朗嗰時違犯兩項球員規例,要佢喺當地時間下星期二前回應。呢兩項條例係關於球員唔可以直接或間接參與自己有份或其他任何足球項目嘅賭博,而另一條就係有關球員唔可以向其他人提供比賽相關資訊作賭博用途。即係話,史獨可能涉嫌投注或者向外界過料提供資訊,佢可以喺下星期二當地下午六點前回應,如果罪名成立,最嚴重會終身停賽。

紅軍全力配合調查

史杜列治今年一月底由利物浦外借到西布朗,交易前10日,博彩公司就呢單交易開出嘅賠率係67倍,外界普遍認為,呢位英格蘭前鋒外借去國際米蘭或紐卡素嘅機會較高,不過嗰時就有不明來歷嘅資金落重注買佢去西布朗,令賠率急跌至3.5倍。據悉,英足總相信史杜列治喺今次事件入面冇份投注,但有可能向外界洩露轉會嘅內幕消息。

英足總發佈檢控史杜列治嘅消息後,利物浦亦都隨即發表聲明,表示球會同史杜列治會配合有關調查:「丹尼爾(史杜列治)已經向球會保證,會喺整個調查過程入面全力配合,佢亦都明確向球會表示從未參與任何足球博彩活動。同所有問題一樣,我哋會等整個調查完結先作進一步評論。」

球員涉賭冇好下場

英球壇近年發生過多宗球員參與賭博或操控賽果嘅事件,曾經效力多支英超隊嘅祖爾巴頓,上年就被控喺06年效力曼城嗰時參與過1,200次足球投注,結果足總罰佢停賽18個月兼罰錢,經多次上訴後先減刑到五個月;前阿根廷國腳迪米捷利斯同家陣效力緊水晶宮嘅安祖斯唐辛,亦都因為賭波被罰款同停賽。近年最嚴重嘅案例發生喺2017年,當時效力英格蘭第六級別聯賽球隊艾費頓城嘅後衞班特利活特,佢被足總指控喺兩次比賽時蓄意犯規領黃,令個別人士喺投注中獲利,佢亦都參與25次投注,今年被足總重判停賽六年!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載