› 選擇地區
三藩市
紐約
洛杉磯
其他美國地區
香港 台灣 北美
 
2018年11月18日

求驗客手記:兩蛋贈法國返晒嚟
荷蘭踢德國降班

上月曾大勝德國嘅荷蘭,上星期五喺歐洲國家聯賽A1組賽事主場硬撼世界冠軍法國,靠韋拿杜姆同迪比喺上下半場各入一粒贏2:0,兩個月內連挫兩支強敵,唔怪得教練朗奴高文賽後好得戚咁話球隊已經重振雄風。不過荷蘭咁樣一贏,德國就躺着中槍,率先喺A級聯賽降班,兩年後要降格踢B級聯賽。

法國15戰不敗斷纜

法國今場除咗缺少受傷退隊嘅保羅普巴,幾乎已經派出最強陣容應戰,好似基沙文、基利安麥巴比同尼高路簡迪等主力都喺度,但落場後好似處處受制於鬥心更強嘅荷蘭。結果,44分鐘就因為尼桑斯頭槌解圍失誤,個波輾轉落到賴恩巴布腳下,雖然佢起腳被洛里斯擋出,但韋拿杜姆即刻衝前補中,呢個比數一直維持到補時六分鐘,橙軍就有法蘭基迪莊喺禁區被侵犯博到12碼,橙軍由迪比主射得手,幫主隊以2:0勝出,亦令法國連續15場國際賽不敗嘅走勢告一段落,但就仍然落後呢支今夏世盃冠軍一分排A1組第二。

最慘可能係同組嘅德國,就算啱啱喺友賽大勝俄羅斯疑似回勇,但星期一未鬥荷蘭前,就已經要提前宣佈喺歐國聯降班。因為佢哋已經落後橙軍五分,就算星期一贏波,都冇可能喺分數上超越對方,2020年要降落去踢B級聯賽。不過對荷蘭嚟講,下場賽和德國嘅話,就可以憑同法國對賽時嘅較佳得失球差準則,成為小組冠軍,晉級明年六月嘅歐國聯決賽周。

朗奴高文牙擦擦

今年二月先上任嘅橙軍主帥朗奴高文,用咗九個月去重整國家隊,終於叫有番少少成績,所以賽後都講咗一堆好鼓勵性嘅說話:「我哋已經展示出可以重新企番起身,我冇諗過可以踢到一場咁精采嘅比賽,亦冇諗過成場波可以有咁強嘅控制力同閱讀球賽嘅能力,我哋踏出咗好重大嘅重建步伐。當然法國亦踢得一般,只係一直防守,如果唔係洛里斯,我哋一早已經贏到三至四球。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載