› 選擇地區
三藩市
紐約
洛杉磯
其他美國地區
香港 台灣 北美
 
2018年11月22日

求驗客手記:高效過阿古路、奧巴美揚
馬迪爾變英超神槍手

近日盛傳曼聯有機會喺出年夏天再度訪港,但講真到時仲係咪摩連奴揸旗,或者家陣呢隊紅魔入面,到時仲有邊幾個效力緊,真係冇人答到你。好似呢個零月Fit到漏油嘅法國前鋒安東尼馬迪爾,一直都傳佢喺奧脫福嘅日子唔會好耐,但睇番今季一啲數據,紅魔如果賣走佢,分分鐘第時會後悔。

山神刷智利入波紀錄

英國《每日郵報》做咗個統計,馬迪爾係今季英超入波最高效嘅前鋒,仲勁過𠵱家喺射手榜入波多過佢嘅阿古路、夏薩特同奧巴美揚。對上5輪聯賽入6球嘅馬迪爾,只要平均103.5分鐘就可以入到一球,而第二位嘅阿古路(110.5分鐘)同第三位嘅夏薩特(111.8分鐘),都落後佢差唔多成七分鐘。同之前三季相比,馬迪爾上季最勁,但平均都要175.9分鐘先入波,證明佢今季真係有好大進步。另外,統計入面仲有傳球成功王呢個榜,今季加盟車路士嘅佐真奴費路嘅成功傳送次數高達1,083次,而第二位嘅阿仙奴中場格列沙加,都只係得819次,少過佢足足二百幾次。

曼聯喺嚟緊嘅星期六英超會主場面對水晶宮,如果馬迪爾再有入波,就會同名宿簡東拿、雲尼斯達萊同基斯坦奴朗拿度等人睇齊,皆因以上呢幾位前輩,都試過連續六場英超建功,但最勁嘅梗係雲佬,跨季連續喺10場英超上陣入波,但要追平呢個紀錄就唔易。

除咗馬迪爾,阿歷斯山齊士下季仲喺唔喺度都好難講,由今年一月加盟至今都係入得四個聯賽入波,但佢最近連續代表智利出戰兩場國際賽都有建樹,其中星期二大勝洪都拉斯4:1場波,佢本來射12碼宴客,但之後成功補中,射入國家隊生涯第41球,刷新隊史入波紀錄。

馬達唔急續約諗前途

比起馬迪爾同山神,我估曼聯球迷最唔捨得可能係家陣都仲未續約嘅桑馬達。雖然摩佬唔係經常用佢,但都照樣任勞任怨,《ESPN》最新報道,就話佢要慢慢諗清楚未來,所以唔急住同曼聯傾新約。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載