› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

求驗客手記:七國咁亂 自由盃再delay
阿根廷足球之恥!

無奈離場
得悉球賽又延期,河床中場佩雷斯(中)同隊友步離球場。

河床對小保加嘅南美自由盃決賽次回合賽事一改再改,由上星期六改到星期日舉行,點知最後都係踢唔成,需要第二次改期,更加有消息話呢場世紀大戰,最後可能要移師到海外舉行,真係阿根廷足球之恥!

上星期六小保加隊巴受到河床球迷襲擊,俾人掟石同硬物,連玻璃都爆埋,中場柏保路佩雷斯喺事件中左眼受傷,而泰維斯等部份小保加球員,就因為吸入警方發射嘅胡椒噴霧搞到唔舒服,最後南美足協宣佈將賽事延至星期日先踢。不過到星期日開賽前兩個鐘,雖然已經開始有球迷入場,小保加方面亦公佈咗正選陣容,但係場外氣氛依然緊張,小保加最後就因為球員受襲擊事件影響,以暫時唔適宜作賽為由,向南美足協申請押後比賽。南美足協最後宣佈比賽再次延期,將會喺當地時間星期二上晝公佈重賽日期。

河粉靠細路運煙花

據了解,今次小保加遭到襲擊一事,係由河床一個右翼激進球迷會發起,呢個球迷會會長嘅屋企喺比賽前一日就俾警方搜查,不過最後都係阻止唔到今次嘅暴力事件。

另外,阿根廷政府同南美足協都被炮轟冇做好保安,有傳媒發現有河床球迷為咗避過球場安檢,將煙花綁喺隨行小朋友身上,妄顧兒童安全!曾經效力小保加嘅名宿馬勒當拿就批評喺阿根廷連睇波都冇保障:「阿根廷全國冇一個地方安全!」另一名宿列基美都認為事件令原本嘅球壇盛事變質:「呢場波已經唔再重要,重要嘅係球員嘅安全!」

次回合或移師阿布扎比

呢場決賽嘅首回合雙方踢成2:2,次回合幾時先踢得成就仲未知,不過《ESPN》透露,南美足協就研究緊轉移比賽場地嘅可能性,由於自由盃嘅冠軍得主將會喺緊接嘅12月12號出戰喺阿聯酋舉行嘅世冠盃,所以南美足協有可能將呢場賽事移師阿布扎比舉行,等冠軍球隊可以直接留喺當地準備。如果係咁,河床就會直接失去主場之利,到時河床就真係多得班球迷唔少啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載