› 選擇地區
三藩市
紐約
洛杉磯
其他美國地區
香港 台灣 北美
 
2018年12月14日

求驗客手記:四年忘年戀玩完
老馬俾嫩妹趕出門口

好多球迷應該都記得今夏世盃,阿根廷球王馬勒當拿喺看台上睇睇吓波,突然同後生佢29年嘅女友奧莉華情不自禁激吻嗰幕,搞到坐喺佢兩個隔籬嘅「大哨」朗拿度,都唔知畀咩反應。以為呢段忘年戀打得火熱,七月嗰陣仲有報道話老馬已經求婚成功,點知外國傳媒最近爆料,話老馬已經畀奧莉華飛咗,仲要畀對方踢出屋咁失禮,但最爆笑係間屋係老馬當年親自買嚟送畀奧莉華嘅,點知家陣反轉豬肚,留低人財兩失嘅老馬孤伶伶一個。

大屋原來係冧女禮物

英國《太陽報》收到阿根廷傳媒啲風,一個叫Lio Pecoraro嘅記者證實老馬同奧莉華分開咗,而且仲要係女方主動提出分手後,趕老馬出愛巢,但係呢間喺阿根廷貝拉維斯塔嘅大屋,其實係老馬買嚟送畀佢嘅,但老馬喺呢位細佢29年嘅女友面前原來都好脆弱,Lio就話老馬唔想走,可能諗緊點箍煲。

到底係咩原因搞到兩人分手,外界都唔多知,有人就話因為老馬家陣喺墨西哥次級聯賽多拉多斯教波,而奧莉華就唔想跟老馬搬去墨西哥,所以兩個人因為呢件事已經冷戰咗一星期,但最後都係傾唔埋欄,所以女方決定分手。聽講奧莉華仲決絕到走上電視節目,證明自己現正單身。如果好似傳聞所講,睇嚟老馬真係要放棄呢份教練工作先得,否則呢段四年嘅忘年戀,好大機會玩完!

老馬被女友踢出屋有失霸氣,但佢個女簡妮亞,即係阿古路前妻,呢排就真係繼承咗「馬家」嘅「狂野血統」,向喺社交網上人身攻擊嘅網民還擊。

乖女晒籮反擊「床迷」

事緣「馬家」愛隊小保加周日喺自由盃決賽輸咗俾河床後,有好多河床球迷乘機上佢個ig百般羞辱,令到簡妮亞終於忍唔住,但出人意表係佢喺ig story上載一張影住自己拱起pat pat嘅相,晒臀還擊,意即寸河床球迷冇資格同佢講嘢,而且佢仲加咗三個黃色同藍色嘅心心,代表小保加嘅顏色以示忠誠,之後再出多個post,鬧爆有啲人可能根本唔係河床球迷,乘機抽水超可恥咁話,睇嚟阿女真係仲好火過老馬。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載