› 選擇地區
三藩市
紐約
洛杉磯
其他美國地區
香港 台灣 北美
 
2018年12月30日

求驗客手記:梅開二度保祖記金身
C朗最佳員工

C朗今場入兩粒,幫祖記險勝作客嘅森多利亞。路透社

意甲上周六上演2018年最後一輪賽事,榜首嘅祖雲達斯主場迎戰近況大勇嘅森多利亞。祖記有基斯坦奴朗拿度(C朗)梅開二度下,以2:1險勝對手,保持上半季不敗之餘,亦打破由自己保持嘅意甲上半季得分紀錄,威到盡迎接19年!

今場祖記排出強陣迎戰森多利亞,其中之前話年尾兩場會唞吓,但上場以後備身份出場射入扳平一球嘅C朗重返正選陣容,拍住文迪蘇傑同保羅戴巴拿攻堅,結果開波只係兩分鐘,呢位葡萄牙球星已經喺左路接應戴巴拿嘅長傳,推大位起右腳射門得手,為球隊打開紀錄。不過去到33分鐘,中場安利簡恩因為防守角球時喺禁區犯手球,俾球證吹罰12碼。35歲嘅森多老將加利亞雷拉一射中鵠,連續九場有上陣嘅意甲都有入波,係05年效力祖記嘅法國射手查斯古特之後意甲第一人,雙方半場打成1:1。

VAR判森多食詐糊

易邊再戰後,祖記都係稍佔優勢嘅一隊,不過一直入唔到波。但去到65分鐘,祖記一次角球攻勢,森多後衞阿歷士費拉利被指手球,球證吹罰12碼。C朗上前操刀之下亦冇走雞,除咗將比數改寫成2:1,亦射入18年祖雲達斯喺各項賽事嘅第100球。比賽尾段,森多曾經靠後備入替嘅中場沙普拿拉禁區外射入世界波,一度將比數扳平,可惜球證睇完VAR之後,發現沙普拿拉喺接應前身處越位位置,森多最終食詐糊,球隊亦以1:2不敵祖記,三連勝走勢告終。雖然C朗今年「只係」入咗49球,係10年以嚟首次入唔過50球,但都值得攞「最佳員工獎」啦。

艾基利唔吼紅魔

祖記今仗贏波之後,19場比賽收穫17勝2和,延續上半季不敗走勢。此外,半季累積53分,亦係意甲進入20隊時代後嘅新高,改寫由自己所保持嘅舊紀錄,非常犀利。咁勁嘅戰績,難怪教練艾基利引起唔少強隊嘅注意,最近就有報道傳出,話英超班霸曼聯有意喺季尾向艾基利招手,邀請佢下季執掌紅魔,但係艾基利喺賽前記者會就表示喺祖記非常開心,暫時無意走人︰「我同球會一齊創造緊更好嘅成績,去到下年六月我哋仲有好多比賽,仍然要繼續努力。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載