› 選擇地區
三藩市
紐約
洛杉磯
其他美國地區
香港 台灣 北美
 
2019年01月03日

求驗客手記:射破所有英超對手
卡尼百發百中

熱刺喺上場爆冷主場輸畀狼隊後,新一年有好開始,星期二英超元旦尾場作客卡迪夫城,靠哈利卡尼、基斯甸艾歷臣同孫興民上半場各入一粒,以3:0輕取對手暫回次席。其中卡尼嘅入波,令佢成功射破職業生涯對過嘅28個英超對手大門,成功率達100%,仲威過亨利同埋高爾等傳奇射手!加上艾歷臣同孫興民都狀態大勇,下輪英超鬥回勇嘅曼聯,一定好睇!

半場贈夠卡城三蛋

話說熱刺之前俾狼隊打破領隊普捷天奴保持咗27場對升班馬嘅不敗身,事隔三日熱刺又要出戰另一支升班馬卡迪夫城,好彩班熱刺兵非常爭氣,開賽三分鐘捷比亞右路傳中,卡城守衞桑摩利臣解圍失誤,將個波省落卡尼度反彈入網,幫熱刺早早領先,呢球亦係卡尼近4場第5個入波。踢到12分鐘,孫興民將個波傳畀禁區頂嘅艾歷臣,呢位丹麥中場避開守將後射近柱破網;踢到26分鐘,就輪到孫興民自己帶波去禁區右路窄位射遠柱入網,令熱刺上半場贏住三球返更衣室。

下半場主隊攻勢欠奉,最後熱刺保住上半場三球嘅勝局去到完場,賽後普捷天奴大讚:「我哋一開始已極具把握力,踢咗26分鐘就領先3粒真係好正,我哋完全主宰咗比賽,10日踢4場係好困難,但今場贏波畀到我好大信心。」

艾歷臣榮膺遠射王

根據《Opta》嘅數據,今場係卡尼職業生涯第四次喺英超鬥卡迪夫城,而佢今仗嘅入波,令佢完成射破職業生涯所有英超對手(見附表)創舉,比起前阿仙奴前鋒亨利鬥35隊攻入34隊,同曼城射手阿古路鬥32隊攻入31隊仲勁。

至於熱刺中場艾歷臣,連埋星期二嘅入波,亦成為熱刺史上第6位直接或間接貢獻100個英超入球嘅球員,分別係45個入波同55次助攻,同時亦成為近五年禁區外最多士哥嘅「遠射王」,已經累積咗19球喇!加上南韓前鋒孫興民射入近9場嘅第8個入波兼交出第4次助攻,狀態可謂fit爆!未知熱刺下場英聯盃四強對手車路士同下場聯賽對手曼聯,有無辦法守得住佢哋?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載