蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月07日
馬上成為壹會員

求驗客手記:炒12碼落車留憾
法比變喊包

上星期六車路士主場對諾定咸森林嘅英足盃第三圈賽事,好有可能係法比加斯喺英超嘅最後一戰,呢位西班牙中場大師完場之後繞場一周接受球迷掌聲,期間更不禁流下男兒淚,場面感人!

呢一場係法比第501次為英超球隊上陣,今季英超冇乜機會落場嘅佢喺31分鐘操刀射12碼,可惜被森林門將史迪利撲走咗。不過好彩隊友兼同胞艾華路莫拉達生性,喺下半場連轟兩粒,最尾幫車仔贏2:0殺入第四圈。法比冇踢足全場,喺85分鐘被換走,由隊友尼高路簡迪入替,全場球迷都報以掌聲。

莫拉達起孖淘汰森林

完場後,法比留咗喺球場入面繞場一周,同一眾車迷告別,最尾亦都忍唔住當場淚灑球場。離隊已成定局,法比賽後咁講:「嗰個時刻戰勝咗我。我冇預計呢一切會喺今日發生。為咗尊重車路士,我咩都唔可以講,但每個人都知道發生咩事。」

31歲的法比加斯一共喺英國球壇射入79球,貢獻咗148次助攻,幫車路士贏過兩個英超冠軍嘅佢勉勵後輩繼續努力:「時光飛逝,感覺好似上個星期先展開自己嘅職業生涯,但係不知不覺已經15年喇。至於畀年輕球員嘅建議,就係要享受每一秒。」隊友巴克里亦祝福法比有美好前程:「我見證佢喺場上面嘅反應超快。無論佢下個決定係點,能夠同佢同場係我嘅榮幸。」

傳投摩納哥同亨利團聚

法比喺車路士嘅合約到季尾就約滿,佢目前為止都未有同球會續約,盛傳佢嘅下一站會係法甲榜末分子摩納哥,同昔日槍手隊友、摩納哥教練亨利團聚。法比據報已經飛咗去法國傾加盟細節。摩納哥今季深陷降班危機,經歷18輪聯賽仲排喺尾二,即管睇吓法比做唔做得成救世主。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載