蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月09日
馬上成為壹會員

求驗客手記:嬲豬反擊 無辜費托都中箭
魯能同香港球迷開年

賀歲盃初三晚就踢完,但餘波未了,唔知係咪嗰日係赤口,豬年流流爭執不斷,事關以3:1輕取鳥棲砂岩捧盃嘅中超球隊山東魯能,全場比賽都俾香港球迷用噓聲招呼,搞到佢哋火屎咁㷫,賽後慶祝嗰陣,同港人之前已經有好多牙齒印嘅門將王大雷就披上五星旗喺度繞場一周,唔知仲以為佢捧咗世界盃咁威,賽後魯能又喺instagram出post,寫話「取得勝利是對噓聲最好的回應」,擺到明借住赤口同香港球迷「開年」。

話說魯能就上載咗三張相,第一張就已經係王大雷披五星旗嗰張,擺明知呢張相夠爆,肯定搞到你班香港人嬲,果然下面有好多留言,全部係中港球迷互相罵戰。香港球迷就當然寸佢哋就算贏世界冠軍都冇用,因為冇品,而內地球迷就鬧港人「唔愛國」、「小野狗」,但我求大俠就覺得有啲留言都好無厘頭,譬如鬧港人「窮逼」,吹噓「老子就是有大屋住,怎樣?」呢類,好似同足球冇乜關係。至於王大雷本人亦有喺微博上載自己捧盃相,內地網民亦力撐呢位門將,仲讚佢「狠狠的打港獨的臉」,甚至有網民咁講「你爸爸永遠是你爸爸,不服別看」。

相關新聞:資料庫:王大雷辣㷫港人有前科

咒費托遲早斷腳

歸根究柢,我覺得都好大原因係近年中港矛盾問題,但都認同魯能真係好冇品,其中幾位球員就同鳥棲前鋒費蘭度托利斯喺比賽中有口角,而且有球迷賽後仲上埋人哋個社交網站搞事,鬧人「你還真當你是個球星?」,又咒人遲早斷腳咁。呢位曾經踢過利物浦同馬德里體育會嘅前西班牙國腳,喺香港都有好多球迷,咁樣將人哋拖埋落水鬧,就唔怪得港人睇唔過眼。

艾傑臣話想入籍

山東魯能踢完賀歲盃,就要返中國備戰亞冠盃附加賽。至於以中超冠軍身份直入亞冠盃分組賽嘅上海上港,隊內嘅巴西外援艾傑臣就話有意入籍做歸化兵。如果國足有呢位已經喺中超入成88球嘅前鋒加入,可能進攻線真係會強番少少。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載