蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月10日
馬上成為壹會員

求驗客手記:各界幫忙願沙拿安息

阿根廷前鋒伊美利安奴沙拿因重返南特同舊隊友道別及執拾行裝,最終喺上月21號坐飛機去新東家卡迪夫城報到途中失去聯絡,失蹤17日後終於喺大海中搵番佢嘅遺體,證實空難喪生。南特今日會喺法甲出戰尼姆,教練夏利荷錫上周五喺賽前記者會上,仲喊住話:「如果要全體出席喪禮,我哋會詢問法甲賽會同法國足總,但我哋會同沙拿關係密切嘅隊友討論。」佢仲講球隊會喺集訓前進行小儀式去悼念同向沙拿致敬,又會向佢家人致以深切慰問。

另外,發生空難失蹤客機嘅機師伊保臣目前仲係下落不明,但早前協助沙拿家人嘅私人搜救團隊主管,有「海難獵人」之稱嘅David Mearns,竟然話機師家人未有同佢聯絡,所以未有行動。自從打撈咗沙拿屍體後,佢已停止咗手頭上工作,接受《每日鏡報》訪問時講:「我嚟係為咗幫助沙拿家人,自願性嘅。」佢亦話假如伊保臣嘅家人有邀請佢,佢會同對沙拿家人一樣咁幫佢哋,但佢就冇收到任何聯繫。

至於卡迪夫城大馬華裔班主陳志遠,會向伊美利安奴沙拿家人伸出援手,願意支付將遺體運返阿根廷嘅所有費用。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載