› 選擇地區
三藩市
紐約
洛杉磯
其他美國地區
香港 台灣 北美
 
2019年02月11日

求驗客手記:入替博到12碼做功臣
武球王登基!

中國國腳「武球王」武磊喺上月衝出中超,由上海上港轉投西甲愛斯賓奴,令13億人都為之興奮。武球王去到新東家唔係齋擺,極速傷癒後喺最近連續兩場西甲都有份踢,喺上周六主場對華歷簡奴仲做埋功臣,後備入替為愛斯賓奴博到12碼,響起反勝號角,主隊先靠極刑扳平,最終以2:1反勝,延續有武球王在陣下嘅不敗走勢。

愛奴主場首戰即贏

武球王加盟愛斯賓奴,喺月初西甲作客維拉利爾一仗首次亮相,完場前12分鐘後備入替。到上周六主場對華歷簡奴,佢都係先被列為後備但作用仲大;球隊喺上半場33分鐘失守,失波前主隊有前鋒皮亞堤受傷被抬走,教練路比到34分鐘先換武磊入替。武磊上陣後表現幾活躍,到69分鐘佢殺入禁區被對手鏟跌,球證經VAR協助下直指12碼,極刑由保查艾利斯亞斯操刀射入,愛奴喺72分鐘扳平1:1。踢到補時五分鐘,之前食過詐糊嘅沙治戴達接應羅沙里斯傳送射入絕殺球,為愛奴奠定2:1勝局。

武磊喺愛奴上演主場「地標」戰,賽後受訪話︰「呢次係我第一次喺主場亮相,其實我賽前都冇諗過會有咁多上陣時間。最重要始終係贏波,愛奴主場氣氛好好,我想多謝球迷、教練同所有隊友對我嘅幫助,令我更快融入。」

賽後證實皮亞堤傷及膝部十字韌帶,預計要休戰一段時間。雖然唔係好消息,但對武磊嚟講,無疑係個好機會。唔使講國內傳媒同唔少網民都大讚武磊,連西班牙傳聞都讚好,《每日體育報》喺球員評分畀佢最高分,而《世界體育報》亦將武磊個名放喺標題,大讚佢照亮愛奴成為反勝功臣。

同日西甲亦有馬德里打吡,皇家馬德里作客馬德里體育會由卡斯米路、沙治奧拉莫斯同加里夫巴利各建一功以3:1贏波。倒戈嘅皇馬門將泰拔高圖爾斯,自然被主隊球迷視為叛徒,成為主要攻擊對象。有相信係馬體會球迷喺萬達大都會場外嘅高圖爾斯紀念石板上,黐咗個紅色大交叉貼紙,同埋掉低幾隻玩具老鼠。

高圖爾斯變過街老鼠

曾經喺2011至14年效力馬體會嘅高圖爾斯,幫球隊贏過西甲,佢賽前話理解球迷今次咁樣做︰「就算佢哋想掟嘢落我個頭,都唔會對我造成影響,咁樣只會令我更有動力。」高圖爾斯講得冇錯,最緊要始終係贏波,巴利喺呢場波後備入替為皇馬射入第三球奠勝,亦係佢喺皇馬入嘅第100球,自2013年加盟皇馬,至今各項賽事上陣217場比賽,終於到達呢個里程碑。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載