蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年03月26日
馬上成為壹會員

求驗客手記:變陣作客絕殺橙軍
德國乜仇都報晒

星期日嘅歐國外C組重頭戲,德國作客荷蘭,一度領先兩球下被追平,最後都靠後備落場嘅馬高列奧斯助攻左翼衞尼高舒侯斯絕殺3:2,近23年首次作客贏「橙軍」,教練路維今場變陣打3-4-1-2縮後嚟踢,總算為德國吐氣揚眉。

德國由上年世盃分組賽出局開始,一路衰到星期日,上年底嘅歐國聯亦試過作客荷蘭輸三粒,最後要喺歐國聯降班,14年世盃冠軍嘅顏面掃晒地,而今次點兵前,路維革扯三位老臣湯馬士梅拿、曉姆斯同謝路美保定,已經有好大回響,最大問題係德國上星期友賽主場只能夠逼和塞爾維亞1:1,令到路維更大壓力。今場德國改踢3-4-1-2陣式,用一對翼鋒利萊辛尼同基拿比打箭頭,卻奧斯同甘美治擔任雙防中,改打穩守突擊,控球率、傳波都輸畀荷蘭,但就對缺中鋒嘅德國嚟講,效果反而更好。

辛尼15分鐘開紀錄

今場德國15分鐘就先開紀錄,尼高舒侯斯左路地波傳中,利萊辛尼喺小禁區左路抽射破網,34分鐘中堅魯迪格長傳,基拿比控定後單人匹馬挑戰荷蘭隊長華基爾雲迪積克帶領嘅防線,仲喺雲迪積克面前推橫右腳抽網頂入,半場贏到2:0。荷蘭教練朗奴高文半場換入小將翼鋒貝雲積,前鋒迪比就生猛好多,48分鐘左路傳中畀中堅馬菲斯迪歷特頂入。63分鐘迪比接應韋拿杜姆傳送,第一時間勁抽,射破紐亞把守嘅德軍。

23年首次作客贏荷蘭

完場前兩分鐘,路維終於換入馬高列奧斯,兩分鐘後佢喺左路傳中畀入楔嘅尼高舒侯斯鏟射得手,德國絕殺贏3:2,歐國外旗開得勝,亦都係荷蘭自從96年4月以來,首次主場輸俾德國。同組北愛爾蘭主場2:1贏白俄羅斯,兩戰全勝排榜首。

路維就話德國最緊要冇輸信心:「上半場我哋控制大局,一隊咁年輕嘅球隊,俾荷蘭追平後都冇慌亂,絕殺當然係運氣幫助,亦都係我哋失去咗一段時間嘅嘢,最重要係我哋冇失信心。」而雲迪積克同朗奴高文都好自責,前者話:「我哋至少要拎到一分,我組織得防線唔夠好,俾德國幾次走位就拉開咗。」高文就話,應該換入後防尼敦阿基,打少個前場球員嚟穩住局面咁話。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載