› 選擇地區
三藩市
紐約
洛杉磯
其他美國地區
香港 台灣 北美
 
2019年04月03日

兄弟同心:未準備接阿成班
「佢可以打多幾年!」

去年八月雅加達亞運歷史性奪金,李卡度(左)與師兄姚錦成(右)及師弟郭柏雅是港隊華將代表。資料圖片

「我未ready呀,覺得阿成仲可以打多四年!」近幾年香港七欖,香港男子隊中能進正選的只有翼鋒姚錦成及傳接鋒李卡度,不少人視卡度為阿成的接班人,二人老友鬼鬼,卡度坦言未準備好接班,更期望周五在大球場展開的香港國際七人欖球賽能躋身「種籽組」。

31歲的阿成及27歲的卡度是去年雅加達亞運金牌功臣,阿成更在亞運決賽達陣,卡度表示:「阿成𠵱家仲好『弗』,我覺得下屆亞運佢仲可以打,佢比我有更多大賽經驗,仲會喺比賽時提我點先可以做得更好,所以唔想佢退役,但我會學佢,多啲提點後生華將,希望佢哋日後都有機會入選HK Sevens。」

屬於世界七欖系列賽的HK Sevens,一向受各外隊及遊客追捧,每年大球場都爆滿,是每位欖球員的dream match,將第六度參賽的卡度說:「大球場氣氛一流,我哋係東道主,好享受現場球迷邊大叫『香港隊』同我哋加油,呢啲經驗海外唔會有。」

挾應屆亞運金牌出戰今屆七欖,卡度坦言這光環是推動力:「金牌令我哋知道我哋有能力應付其他球隊,只要我哋付出100%,今年就有機會入『種籽組』。」香港隊身處的「外圍賽」E組,同組有湯加、津巴布韋及菲律賓,全部12隊先進行循環賽,之後淘汰賽中勝出一隊,可於明年躋身「種籽組」,跟傳統勁旅如斐濟及新西蘭交鋒。

香港女子隊將於本周四在掃桿埔出戰世界女子七欖系列賽外圍賽Y組,同組有肯亞、巴布亞新幾內亞及烏干達,她們期望爭取躋身周五在大球場的八強賽。

相關新聞:金牌巨星:偶像出污泥而不染斐濟隊長夠爭氣

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載