› 選擇地區
三藩市
紐約
洛杉磯
其他美國地區
香港 台灣 北美
 
2019年04月21日

求驗客手記:普巴迪基亞要大幅加薪
蘇B嬲爆:面對現實

曼聯近期戰績越踢越沉,英超已跌落第六位,歐聯亦喺八強出局,下屆有冇得踢歐聯都成問題,據講曼聯球員份約寫明,踢唔到歐聯就自動減底薪25%,所以有傳中場保羅普巴同埋龍門迪基亞,趕頭趕命喺呢個季尾階段,要求紅魔提供大幅加薪嘅新約,務求打定底先,嬲到領隊蘇斯克查叫部份球員面對現實!

驚死冇歐聯踢要減薪

曼聯喺蘇斯克查坐正之後,喺歐聯同英足盃出局,聯賽4場都只係2勝2負,家陣喺英超以64分排第6位,落後排第4嘅阿仙奴同埋踢多場排第5嘅車路士2分,爭前四形勢被動,而且紅魔下周中仲要鬥曼城,要搶分唔容易。

如果曼聯最後冇歐聯踢,球員底薪可能要減25%,同2016年錯過歐聯時情況一樣。《泰晤士報》聲稱,普巴同迪基亞相當清楚呢個情況,所以趁家陣情況未明朗嘅時候,就要求大幅加薪。同曼聯仲有兩年約嘅普巴,周薪係29萬鎊,至於新合約談判已經膠着咗幾個月嘅迪基亞,家陣周薪就係20萬鎊,但就未知佢哋要求嘅加幅係幾多。而之前亦都有傳聞話,喺20年同曼聯約滿嘅青訓產品拉舒福特都要求加人工,雖然球會到時可以自動續約一年,不過有傳今季喺英超入咗10球嘅福仔要求加薪去到20萬鎊,想加咁多人工會係佢同曼聯傾新約嘅最大障礙。

暗示馬迪爾能力有限

一向畀人溫和感覺嘅蘇斯克查,亦都喺上星期五嘅記者會開火,直指隊內部份球員係時候面對現實:「球隊入面大部份球員,態度都的確令我留低好深刻嘅印象。不過,某啲球員就係時候面對現實,當你喺練習場同比賽時,冇辦法唔見真章,大家都清楚你嘅能力去到邊。」睇嚟蘇B好唔妥某啲球員自視過高,畀得唔夠多心機進步,不過蘇B就梗係冇指名道姓。記者追問佢,係咪講緊年初續約後表現大幅下滑嘅法國前鋒安東尼馬迪爾,蘇B就冇正面回應問題,「我同好多球員傾過我對佢哋嘅期望,馬迪爾一定係其中一位。佢有相當好嘅天賦,佢知道球隊需要佢,所以佢要繼續努力。」

曼聯越嚟越亂,前英格蘭國腳贊拿斯仲加把口:「我認為曼聯搵蘇B坐正,只係個情感上嘅決定,唔係一個深思熟慮嘅長遠之計。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載