蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年04月24日
馬上成為壹會員

求驗客手記:女球迷餵BB式攬實慶祝
希古恩嬲到掟樽

車路士前鋒希古恩,星期一英超就打破五場聯賽入球荒,射入幫車仔一度反超前2:1嘅一球,去到場邊慶祝時仲俾個身形豐滿嘅女球迷,雙手攬實個頭落心口,不過車仔最後主場都係俾般尼逼和2:2,踢多場下以1分超越阿仙奴升上第4位,但前四席位一啲都唔穩!

打破入球荒後被換走

今場車仔主場出擊,但開波八分鐘就俾般尼嘅軒迪克先開紀錄,失咗佢哋踢英超以嚟第1,000球,係第9隊波去到4位數,好彩12分鐘由尼高路簡迪接應夏薩特傳送射入,14分鐘希古恩禁區右路窄位狂抽網頂,射個靚波幫車仔反超2:1,而希古恩跑去場邊慶祝就仲精采,事關觀眾席有個黑衫嘅女球迷,就雙龍出海攬實希古恩個頭,非常肉緊咁扯佢落心口,經歷咗一段未必唞到氣嘅時光,雖然希古恩身邊有赫臣奧杜爾、艾斯派古達、佐真奴費路等隊友掩護,但都俾眼利嘅網民發現咗,仲講笑話呢個係年度最佳慶祝!

不過好快之後,般尼喺24分鐘由艾殊利班尼斯近射扳平,就咁同車仔打和2:2。希古恩亦喺77分鐘被換出,由基奧特入替,但希古恩似乎唔多開心,嬲到喺後備席掟水樽發洩,唔知佢係唔滿意自己表現,定係唔妥領隊沙利換走佢喇。場波去到尾段,仲有沙利同客軍後備席上人員爭執被逐,係佢做車仔領隊以來第一次,副手蘇拿就話,當時般尼嘅人員講啲侮辱性嘅說話,先令到沙利咁躁。

沙利被逐 奧杜爾收「咧」

呢場車仔有赫臣奧杜爾同尼高路簡迪傷出,前者更加跟腱斷裂提早收「咧」,好彩後者據報傷勢唔嚴重,只係安全起見先換佢出嚟,而呢場波車仔痛失兩分,把握唔到今個星期爭前四對手熱刺、阿仙奴同曼聯一齊輸波嘅良機。賽後車仔以67分升上第4,同第三嘅熱刺同分,比身後嘅阿仙奴同曼聯分別多1同3分,但車仔比呢3隊踢多1場,所以形勢算係被動,下星期日作客曼聯,隨時係前四關鍵戰,好彩車仔仲有歐霸盃可以爭,佢哋就算英超有乜「冬瓜豆腐」,只要贏到歐霸盃冠軍,一樣可以踢下屆歐聯,目前佢哋已經殺入四強會鬥法蘭克福。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載