› 選擇地區
三藩市
紐約
洛杉磯
其他美國地區
香港 台灣 北美
 
2019年05月21日

求驗客手記:
麥巴比膺法甲最佳暗示離隊

法國職業球員工會(UNFP)周日公佈各大獎項結果,巴黎聖日耳門(PSG)前鋒基利安麥巴比成為大贏家,榮膺法甲年度最佳球員、連續三年當選法甲最佳年輕球員同入選法甲最佳陣容。不過,麥巴比領獎時嘅感言就惹嚟佢將會離隊嘅揣測。

麥巴比領獎時話︰「呢個對我係一個非常重要嘅時刻,我諗已接近職業生涯第1個或者第2個轉捩點,都係時候去承擔更多責任。我希望係繼續喺PSG,或者去其他地方接受新嘅挑戰。」

麥巴比之後喺混合採訪區接受訪問嗰陣重申:「我講咗我要講嘅嘢,當你身處一個咁嘅活動,你可以發出一啲訊息,我已經表達咗我嘅諗法。如果我再多講,就太多喇。咁成件事就唔同晒,唔係我想傳遞嘅訊息。」麥巴比自16/17球季喺摩納哥冒起兼贏埋法甲冠軍嗰陣,就成日被傳會轉投皇家馬德里,但最後加盟咗PSG。

周日頒發嘅其他主要獎項,包括里爾嘅加迪亞獲選最佳教練,里爾門將邁治蘭當選最佳門將,效力皇馬嘅賓施馬就當選最佳海外法國球員,仲有已退役嘅杜奧巴獲頒榮譽大獎。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載