› 選擇地區
三藩市
紐約
洛杉磯
其他美國地區
香港 台灣 北美
 
2019年05月26日

求驗客手記:費Sir出山都冇面畀
99魔仁再戰缺堅尼傑斯

曼聯近幾季喺英超踢得咁失色,魔迷可能寧願懷緬過去,好過對今季呢支得第六嘅球隊心存寄望,所以星期日喺奧脫福約戰拜仁慕尼黑元老隊、慶祝紅魔膺1999年三冠王嘅20周年紀念賽,有人人愛戴嘅傳奇領隊費格遜出山喺場邊督師,淨係呢個point都夠晒話題性喇!球員方面,包括碧咸在內等大部份三冠王功臣都會重返奧脫福,唯一遺憾就係碧咸兩位昔日中場拍檔堅尼同傑斯,竟然冇份到場。

堅尼被趕走未嬲完

其實嗰年三冠王班功臣,就只係爭咗堅尼、傑斯同菲臘尼維利就齊腳,但後兩者因為分別帶領威爾斯國家隊同英格蘭女足出戰國際賽,都明佢兩個點解會缺席;至於當年嘅鐵血隊長堅尼,上年同奧尼爾一齊俾愛爾蘭足總炒魷後,就繼續跟住奧尼爾去咗母會、英冠嘅諾定咸森林做助教,但隊波入唔到升班附加賽,所以家陣應該係放緊假,咁好機會都唔同班舊隊友聚吓,唯一解釋就係當日被費Sir驅逐出隊後,兩人結怨至今都仲未釋懷,所以今次冇佢份。

不過就算缺三件,今次紀念賽嘅「卡士」都已經夠晒吸引,碧咸、史高斯、舒米高、畢特、史譚、加利佬同埋有「黑白雙煞」之稱嘅四大前鋒全部會亮相,而且朴智星、施維斯達、沙夏同普波斯基呢班唔係三冠王嘅紅魔名宿亦會助陣,根本已經冇得再挑剔。

雖然對手拜仁當年有份參與決賽嘅陣容中,只得馬圖斯、巴布、古科、贊卡、艾芬保同埋後備嘅芬克畀面出席,連當日決賽入波嘅巴士拿同大猩猩門將簡尼都冇份,但搵嚟意大利中鋒東尼、迪米捷利斯、馬卡爾同薛羅拔圖等後輩壓陣,已經算好有誠意。

傑斯菲臘仔要教波

其實呢場紀念賽如果唔撞即將開始嘅國際賽,分分鐘傑斯同菲臘佬都可以加入,皆因紅魔呢班三冠王功臣,冇幾個做緊球會領隊或教練,除咗佢兩個同堅尼,就只得家陣分別帶緊曼聯一隊同青年軍嘅蘇斯克查同畢特、教緊挪超史達比克嘅貝治,同埋喺荷甲維迪斯做緊龍門教練嘅雲迪古,其他好似史高斯、加利佬同舒米高等,只係間中上電視做足球評述,都算得閒,而碧咸雖然搞緊佢隊美職聯新軍國際邁阿密,但好多嘢都唔使佢親力親為,返嚟踢一場表演賽又有幾難呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載