蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年06月12日
馬上成為壹會員

夏日求驗客:季尾冇態失狂牛正選
迪基亞脫魔入門

西班牙主帥安歷基因家事繼續冇喺場邊領軍,今場西班牙有沙治奧拉莫斯、艾華路莫拉達一人入一球12碼,連同奧耶沙巴爾遠柱得手,西班牙3:0輕取瑞典排F組榜首,五分領先瑞典同羅馬尼亞。場波最特別除咗係中堅拉莫斯近8場第7次有波入,就係迪基亞又坐冷板冇得踢,連續三場國際賽被貶。

紅魔送走瘟神搵奧比歷

摩蘭奴話原因係Kepa季尾態好:「佢喺歐霸盃決賽同英超最後幾場都踢得好好,夠晒集中。」相反,迪基亞由上年世盃開始不時犯錯,曼聯季尾0:4輸畀愛華頓嗰場,輸球遠射反應好慢就最肉酸。迪基亞一路唔肯同曼聯續約,合約去到最後13個月,曼聯有傳為咗唔好人財兩失寧願割愛,PSG肯出6,000萬鎊買迪基亞頂替保方,所以曼聯甚至肯分三分一過迪基亞落袋,大家好來好去;迪基亞要搵番狀態,搶番西班牙正選門將位,睇嚟都要換個新環境。

有傳曼聯會搵馬德里體育會門將奧比歷頂替,據報佢自小就係魔粉,雖然同球會合約去到2023年,但因為基沙文、盧卡斯靴南迪斯、高甸同菲臘路爾斯等隊友今夏都走人,26歲嘅斯洛文尼亞國門奧比歷認為馬體會嘅野心唔夠所以都想走。奧比歷剛季各賽事踢50場,有成27場保持不失,係歐洲五大聯賽之最。

祖記要賣五件翻兜普巴

另外,曼聯轉會傳聞停不了,傳祖雲達斯考慮出價1億鎊,買番曼聯嘅法國26歲中場保羅普巴,仲會賣走前鋒文迪蘇傑、中場杜格拉斯哥斯達、古達度、右閘祖奧簡斯路同門將馬迪亞比連嚟套現。據報體育總監柏拿迪治透露,會同新教練傾傾買番普巴嘅可能性。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載