› 選擇地區
三藩市
紐約
洛杉磯
其他美國地區
香港 台灣 北美
 
2019年06月13日

夏日求驗客:同杜奧巴敍舊 官網播片造勢
林伯車長駛達倫敦

車路士盛傳換帥,有英國傳媒最近就影到,前車路士名將林柏特禮拜二同「魔獸」杜奧巴喺倫敦敍舊,有傳藍戰士高屬已經同林伯開始談判,甚至喺官網亦為林伯上「車」造勢,唔怪得林伯已力壓師傅摩連奴同賓尼迪斯,成為下任車路士領隊嘅大熱人選!

今年40歲嘅林柏特,只係上季先開始正式教波,接任打比郡領隊職位,就即刻帶領呢支英冠球會殺入升班附加賽決賽,可惜最終輸咗畀阿士東維拉冇得升班,但IQ超過150嘅林伯,執教功力已經受到外界關注。英國《每日郵報》就話,隨住現任領隊沙利落車轉教祖雲達斯嘅機會越嚟越大,藍戰士高層都要為下任領隊人選做好準備,雖然佢哋對只係教咗一季波嘅林伯,執教經驗有啲疑問,但因為佢喺車仔嘅球員生涯太傑出,班主阿巴莫域治就似乎好冧呢位昔日愛將。

肥賓摩佬回巢得啖笑

正當傳聞越演越烈之際,林伯禮拜二中午就被影到,同佢前車仔舊隊友杜奧巴相約喺倫敦街頭見面。杜奧巴會喺下星期日返車仔主場史丹福橋,同泰利、祖高爾、艾辛及卡維奴等一班舊隊友踢慈善賽,但就冇林伯份,𠵱家突然出現,好難唔令人聯想佢係返倫敦同車仔密斟。

車仔嘅官方twitter,呢排又咁啱得咁橋播番林伯之前幫車仔嘅入波片,唔少車迷就覺得球會係幫緊佢造勢。事實上,外國唔少博彩公司都將林柏特列為上「車」大熱,其中喺Skybet嘅賠率就熱到得番1.25倍,盛傳同紐卡素高層唔啱key、前車路仔領隊賓尼迪斯就有4倍排喺次熱,第三熱門就係無厘頭傳會三度上「車」嘅摩連奴,回巢任教達10倍。

外界似乎對林伯上「車」嘅反應比較正面,就連佢韋斯咸舊隊友、現任職評述嘅里奧費迪南都話:「哥迪奧拿教巴塞嗰時都冇乜經驗喇!林柏特熟悉車路士,知道球員會尊重佢,而且車路士已經試過好多偉大嘅教練,好似安察洛堤、干地同摩連奴都堅持唔到落去,不如畀個機會林伯。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載