› 選擇地區
三藩市
紐約
洛杉磯
其他美國地區
香港 台灣 北美
 
2019年06月21日

夏日求驗客:阿根廷又失分排包尾
美斯複製C朗捧盃路

球王美斯想圓為阿根廷國家隊贏大賽錦標嘅美夢,又面臨嚴峻危機。阿根廷喺周三美洲國家盃分組賽B組第二輪賽事又失分,對巴拉圭只能以1:1逼和對手,2戰1和1負得1分跌落榜尾,最後一場對亞洲冠軍卡塔爾贏唔到就極大機會出局。

美斯曾經幫阿根廷贏過世青盃同奧運男足冠軍,但大國腳嘅正式大賽就仲未贏過,經歷2014至16年連續3年大賽屈居亞軍,到下周一就過32歲生日嘅佢,為阿根廷爭標嘅機會實在唔太多。阿根廷喺美洲盃首戰0:2輸畀哥倫比亞,周三第二輪對巴拉圭整體表現繼續低迷,上半場37分鐘先失守,巴拉圭由李察山齊士接應紐卡素中場米基爾阿米朗傳中射入。換邊後,阿根廷經VAR判定獲得12碼,由美斯射入扳平。相隔五分鐘後佢哋幾乎再失波,守將奧達文迪喺禁區入面鹵莽踢跌對手,好在門將法蘭高艾馬尼撲出由巴拉圭前鋒達里斯干沙利斯主射嘅極刑,但最後都係同巴拉圭打和1:1,再次贏唔到。

尾輪對卡塔爾不容有失

阿根廷2戰得1分,得失球差唔及同分嘅卡塔爾,喺B組包尾。小組煞科戰對卡塔爾贏嘅話就四分在手,出線形勢仲算樂觀,一旦和波失分,就要寄望另一場哥倫比亞唔放水,至少淨勝巴拉圭兩球,先有機會拎小組第三名,再計吓出唔出到線。如果咁丟架輸埋畀卡塔爾嘅話,就唔使計喇,可以直接返酒店執行李。難得嘅係美斯仲好淡定:「我仲好平靜,因為好有信心可以擊敗卡塔爾,保持自信最重要。」

葡萄牙曾絕地反擊奪冠

阿根廷陷出局邊緣,唔通注定球王美斯冇辦法為國家隊贏到大賽錦標?其實又唔使咁灰,另一球王、葡萄牙嘅基斯坦奴朗拿度(C朗)喺16年歐洲國家盃,一樣係喺分組賽陷入困境,小組煞科戰前面對出局危機,最後都可以化險為夷仲一路贏埋冠軍。

16年歐國盃,葡萄牙喺頭2場分組賽得2分隨時出局,到煞科戰有驚無險3:3逼和匈牙利,3戰全和之際全靠嗰屆增設嘅最佳小組第3名出線資格,成功碌入16強,最終去到四強先第一次喺法定時間贏波擊敗威爾斯,再喺決賽加時贏法國,贏到C朗喺國家隊第一個重要錦標,所以美斯都唔使氣餒住,希望在明天吖嘛。

至於同組嘅哥倫比亞,靠杜雲沙柏達喺完場前入波,以1:0險勝卡塔爾,兩戰全勝提早出線。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載