› 選擇地區
三藩市
紐約
洛杉磯
其他美國地區
香港 台灣 北美
 
2019年06月25日

夏日求驗客:門前失機?仲有好兄弟! 壽星美斯鬆口氣

周一係阿根廷球王美斯嘅32歲生日,好在佢唔使愁雲慘霧返老家過牛一。周日美洲國家盃分組賽B組煞科戰,賽前兩戰得一分嘅阿根廷面對出局危機,對住卡塔爾幾乎非勝不可下以2:0贏波,以次名出線八強。又大一歲嘅美斯喺呢場關鍵大戰冇波入兼有一次門前「叉燒」食唔到,但班隊友總算唔使次次靠晒佢都贏到波,呢份生日禮物先最珍貴。

靠隊友破卡塔爾晉級

你話美斯班隊友好生性,其實又講唔上係事實全部,阿根廷對住賽前同樣得一分嘅卡塔爾,前鋒拿達路馬天尼斯喺開賽四分鐘就開紀錄,對手後防嚴重失誤直接將個波傳畀佢輕鬆射入。之後阿根廷仲有唔少機會,美斯傳阿古路射門柱邊出界,中堅奧達文迪近門衝頂又高出,完半場只係領先一球。下半場阿根廷繼續攻勢較多,但阿古路喺61同67分鐘兩次射門失機;73分鐘到美斯發波瘟,門前接應隊友底線傳中,用佢食糊左腳竟然射到九樓高,形勢一路緊張下,阿根廷到82分鐘總算鬆口氣,保羅戴巴拿傳阿古路,後者右路連推過兩個卡軍後衞射地波遠柱入網,奠定2:0勝局。

阿根廷全取三分,喺B組3戰得4分,加上同日另一場小組煞科戰,哥倫比亞以1:0小勝巴拉圭3戰全勝首名晉級,阿根廷就確定次名直接出線,唔使爭最佳第三名。出線八強阿根廷將會對實力一般嘅委內瑞拉,晉級四強難度唔大,唔通真係好似基斯坦奴朗拿度(C朗)喺16年帶領葡萄牙咁,喺該屆歐國盃有危再有機,解決出局威脅後,一路殺入決賽贏埋冠軍。不過阿根廷若果再晉一級,潛在對手就係東道主兼死對頭巴西。

晒MJ合照C朗又認叻

美斯今場冇波入但都獲選MOM,周一過32歲生日嘅佢應該心情好靚,佢賽後話:「今場我哋表現唔太好,但最緊要贏波晉級淘汰賽。呢場後我哋充滿信心,一定要好好利用,之後嘅比賽再冇犯錯空間。」

美斯唔使出局,繼續追逐為阿根廷爭冠嘅夢想,這邊廂已經上岸嘅另一球王、過去三年幫葡萄牙贏過歐國盃同歐國聯嘅C朗,咁啱喺阿根廷晉級後喺ig發文,貼咗同「籃球之神」米高佐敦(Michael Jordan)嘅合照,仲寫住:「我哋創造咗足球界、籃球界嘅歷史。」揀啱時機認叻。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載