› 選擇地區
三藩市
紐約
洛杉磯
其他美國地區
香港 台灣 北美
 
2019年06月26日

體育人訪:「遲父」指導屢破PB
呂麗瑤跨越欄關

訪問前,叫兩師徒鄧漢昇跟呂麗瑤「鬥欄」,結果42歲贏了24歲,在旁的攝影師驚訝說:「佢真係贏到?」有甚麼稀奇?阿昇是昔日欄王,他2004年創下的14秒32港績足足保持了10年,瑤瑤近四年在阿昇指導下成PB王,17年試過1個月內5破PB(個人最佳),最新是今年4月亞錦賽的13秒32,距離塵封25年的港績只差0.18秒,綽號「呂神」的她一直努力跨過種種難關/欄關!
記者:徐嘉華
攝影:李家皓

相關新聞:最後一擊:望世大運放膽衝港績

跟阿昇及瑤瑤做訪問,不但絕無冷場,而且笑聲不絕;不要看阿昇樣子文靜,但說起跨欄,無論是他的陳年往事、威水史,還是愛徒呂麗瑤,可以說個不停;花樣年華的瑤瑤,外表有點冷酷,但說起阿昇,由他愛遲到至脾氣火爆的陋習,到他訓練一絲不苟,為自己鋪好路屢創佳績,也盡顯90後女孩子佻皮活潑的一面。

笑罵師父鄧漢昇乞人憎

瑤瑤從早上九時訓練,由徒手熱身到擺欄練技術都是自己親力親為,一小時過後,阿昇還是沒有影蹤,瑤瑤也苦笑着搖頭,小記也知這不是第一次,阿昇又遲到了。大情大性的瑤瑤也說:「遲到真係好乞人憎,好多時我哋超早到運動場熱身,熱成一個鐘,之後佢又未到,大家你眼望我眼,試過打電話畀佢,佢話:『我𠵱家送完老婆,喺大老山,就到。』佢又唔講定要我哋練咩,我知佢係想睇住我哋練,以免我哋受傷,但遲到好乞人憎囉!」在旁的阿昇尷尬地笑着,有不快就即時說出來,這也許是兩師徒的相處之道,阿昇照單全收,只是身不由己。

現年42歲的阿昇從短跑轉戰跨欄,曾踏上全運及東亞運頒獎台,04年更5破港績,他的14秒32紀錄保持了10年,07年無憾退役後到美國深造,09年回港後正式成為教練,11年結婚的他2女1子,大女六歲、二子三歲、小女一歲多,可以想像他有多忙,阿昇解釋:「我好享受做教練,家人亦好支持我呢份工,我好想每一樣嘢都做好,又想親身去湊細路返學,因為呢啲時間過咗就冇,但每日訓練都練到夜晚8、9點,唔係好多時間同屋企人相處,所以喺許可情況下,做番作為爸爸同老公嘅責任,呂麗瑤講得啱,有啲時間預得好忟水。」

相關新聞:一代傳奇:接力四虎桃李滿門

師徒鍾愛跨欄有滿足感

身高1米77,比阿昇還要高的瑤瑤,15年12月開始跟隨阿昇,撮合兩師徒的正是屈臣氏田徑會「阿姐」徐惠芬(Marina,現香港田總副主席),阿昇憶述時說:「當時係15年聖誕節前,阿姐見呂麗瑤成兩年都係自己練,冇教練跟,就約咗我哋兩個見面,當時我都唔識佢係邊個(其實瑤瑤當時已拿過亞青銅牌,亦曾參加14年仁川亞運會),我最擔心係答應做佢教練後,如果做得唔好,成件事係會攬炒。」看過瑤瑤跟阿昇後的成績,包括17年亞室運金牌及18年雅加達亞運銅牌,就知不是「攬炒」。

以為天生手長腳長的瑤瑤是運動勝利組,但原來跟事實有很大出入,她說:「去到中學因為我唔夠人跑得快,跳又唔夠人跳,跨欄冇人夠膽跨,我咪去跨囉,跨跨吓又覺得OK喎,就繼續呢個項目。」她當時就讀的培正中學,憑着她有份的田徑組,曾由學界D2升至D1。除了成績的鼓舞外,她亦在跨欄找到滿足感,她說:「我鍾意跨欄,畀到我滿足感,呢種滿足感好易攞,你可以試吓跨,其實都好易跨過啲欄,每一次跨過都有滿足感。」無獨有偶,阿昇也是喜歡跨欄那滿足感,高1米75的他說:「我每次跨完欄都鍾意望番後面,係一件好震撼,好有成功感嘅事。」

拜阿昇為師前,瑤瑤個人最佳(PB)是13秒99,17年在1個月內曾5破PB至13秒56,去年更進一步至13秒42,她的最新PB是今年4月多哈亞錦賽的13秒32,本月初重慶亞洲大獎賽,她在超風速下跑出13秒18,是香港近25年來第一人(除了紀錄保持者陳秀英跑過),瑤瑤說:「跑到13秒18嗰一刻真係好開心,雖然超風速(+2.3),但起碼跑過13秒1幾,係一個大進步,如果我喺下月世大運(見另文)跑番1幾,我已好滿足。」

3年內進步0.6秒

瑤瑤在望13秒1幾,阿昇卻望徒弟破13秒以內,甚至挑戰明年東京奧運會,他說:「由3年幾前13秒9幾到13秒32,佢已快咗0.6幾秒,雖然唔能夠話係曙光,但我哋已見到一啲(破港績)光線滲出嚟。」

阿昇坦言除自己的教導外,也有總教練Anthony莊志恆及體院的體能教練一起合作才能成事,還有瑤瑤的專注,這點令阿昇讚口不絕:「我可能阻住佢接少好多job(指廣告或代言的機會),佢專注喺跨欄上係佢走到𠵱家嘅主因。」另邊廂瑤瑤不以為意地說:「我係嗰種休息不足就會影響練習嘅人,我費事畀自己借口,索性唔接(廣告),或者等off season先接。」瑤瑤去年八月雅加達亞運會奪銅,問她亞運銅牌放在那,她想也不想就說:「床下底!」其實她所有獎牌都是放床下:「若將亞運獎牌放當眼處,我怕會自滿,所以冇特別裱起嚟。」

年底將中大學士畢業的瑤瑤,還有半年才滿25歲,除香港紀錄外,還敢去想挑戰明年東京奧運嗎,她說:「我唔會畀自己限期,但破港績呢件事,就越快越好囉!提高0.18秒(距離港績),我𠵱家毫無頭緒要點做,但我知道有機會;至於東京奧運(參賽標準是12秒84或看世界排名積分),就算到時我達唔到標,但跑入13秒內我都會開心到震,你唔使畀我去奧運,我會返房自high。」

師徒倆,一個雖然會遲到,但盡責;一個雖然外表冷酷,但對跨欄一條心,正如阿昇所說:「未來會有更多精采嘅事發生!」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載