› 選擇地區
三藩市
紐約
洛杉磯
其他美國地區
香港 台灣 北美
 
2019年06月26日

夏日求驗客:小將緣盡美洲盃被插唔尊重
森保一寸爆反擊

美洲盃分組賽星期一上演最後兩場分組賽,八強亦全部產生,日本喺C組尾輪俾厄瓜多爾逼和1:1,兩隊齊齊出局,益咗B組嘅巴拉圭以其中1隊最佳小組第3名打入8強。

烏拉圭同智利之前已肯定係C組頭兩名,而喺星期一嘅尾輪比賽,烏拉圭憑卡雲尼喺完場前八分鐘一箭定江山,以1:0小勝智利,3戰得7分以小組首名入8強,智利就以次名晉級。

至於日本對厄瓜多爾呢場,邊隊贏就可以出線八強。以年輕球員為主力嘅日本喺15分鐘先開紀錄,當時佢哋嘅一次攻勢俾出迎嘅厄瓜多爾門將喺禁區邊解圍,但個波落喺中島翔哉腳下,佢喺蛾眉月頂射空門得手,日本領先1:0。

「冇義務出主力」

不過,厄瓜多爾喺35分鐘追平。後衞羅拔艾保列達近門窩利勁射俾日本門將川島永嗣撲出,但俾安祖文拿輕鬆補射入網。兩隊下半場冇再入波,最終以1:1賽和。日本和波後3戰得2分,同B組第三名嘅巴拉圭同分,巴拉圭憑較佳得失球壓倒日本,同A組嘅秘魯成為2支以小組最佳第3名晉級嘅球隊。

日本喺今次美洲盃以2020奧運適齡嘅U23球員為主,配合5名23歲以上球員,旨在吸收大賽經驗,令到委內瑞拉同巴拉圭嘅教練不滿,認為日本唔尊重美洲盃。日本主帥森保一賽前就反擊話:「用長友佑都、吉田麻也,大迫勇也等主力並唔係我嘅義務。」森保一仲話日本足協諮詢過美洲盃籌委會,對方冇強制要求,所以佢選擇咗呢班球員,希望大家理解。

「乳神」復出 巴拉圭有運

另外今年34歲嘅巴拉圭「乳神」娜莉莎列姬美(Larissa Riquelme),10年南非世界盃佢喺巴拉圭對斯洛伐克嘅比賽度,喺巴拉圭入波之後興奮慶祝,着住巴拉圭國旗顏色低胸小背心之餘,心口仲夾住一部Nokia手提電話,結果一炮而紅。今次美洲盃再度現身,心口夾住嗰部手提電話已經升級做iPhone。由於巴拉圭入咗八強,相信球迷仲可以繼續見到佢嚟捧場。

今屆美洲盃八強會喺星期四開始,第一場就係巴西對巴拉圭,之後有委內瑞拉對阿根廷、哥倫比亞對智利同埋烏拉圭對秘魯。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載