› 選擇地區
三藩市
紐約
洛杉磯
其他美國地區
香港 台灣 北美
 
2019年07月22日

夏日求驗客:巴利冇傷都冇份鬥拜仁
施丹:早走早着

夏薩特着50號?皇家馬德里上星期六踢今季首場友賽,喺美國侯斯頓嘅國際冠軍盃鬥拜仁慕尼黑,新加盟巨星夏薩特「地標」竟然着50號波衫,不過原來係紀念50年前美國太空人杭思朗(Neil Armstrong)成為登陸月球第一人,不過皇馬最後以1:3輸波,另一球星加里夫巴利冇傷都俾教練施丹踢出大名單,仲講明叫佢早走早着。

50號夏神地標輸波

皇馬今場有夏薩特打正選,佢着咗件50號波衫,話紀念1969年7月20日嘅人類登陸月球50周年,唔知係咪因為莫迪歷唔肯讓出件10號,7號仔馬里安奴戴亞斯又未離隊,所以要搵個理由頂住先。

拜仁嗰邊有19歲新兵艾比打右翼,湯馬士梅拿打前鋒,狀態明顯較皇馬好,中場哥倫天杜利素15分鐘就開紀錄,夏薩特喺上半場就冇乜表現,結果皇馬下半場已經換晒11個,其他新兵盧卡祖域、洛迪高高斯、費蘭特文迪同埋「日本美斯」久保建英都有落場,不過拜仁分別由後備上陣嘅羅拔利雲度夫斯基同基拿比一人一粒,贏到3:0。

去到完場前六分鐘,洛迪高高斯單刀俾拜仁龍門烏里治鏟低,烏里治就領紅被逐,高斯親自主射罰球破蛋,皇馬就咁輸1:3。不過更精采係賽後訪問,由於今場波皇馬大軍有成28人,但冇傷嘅30歲威爾斯球星巴利都唔喺陣中,一向唔重用巴利嘅施丹,仲講到明叫巴利快啲走︰「我哋希望佢可以快啲離隊,咁樣對所有人都好,我哋正為佢嘅轉會努力,佢轉會一事,家陣已經搞得七七八八,可能一兩日內會搞掂。」施丹就冇講巴利去邊,不過強調係對事唔對人︰「我係教練,必須要做決定,我哋要變,巴利離隊係教練嘅決定,我好肯定對所有人都係好事。」

拜仁歡迎巴利過檔

巴利同皇馬仲有三年約,有傳佢正正就係會加盟拜仁,拜仁中場堤亞高艾簡達拿已經講明:「如果巴利想過檔,或者任何頂級球員想嚟拜仁,我哋都好歡迎。」

皇馬同拜仁星期二都會喺美國再踢國冠盃,「銀河艦隊」會鬥阿仙奴,拜仁就對AC米蘭,唔知到時巴利會唔會已經着起拜仁波衫?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載