蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年07月14日
馬上成為壹會員

【上網抽擊】帶cue棍搭火車被拒陳國明好無奈

建立時間 (HKT): 0714 06:00

喺香港做運動員真係唔容易!曾經幫香港喺亞運攞過兩金兩銅嘅退役桌球手陳國明,近年就喺桌總做教練,希望作育英才啦。點知陳sir佢今日帶住支cue由上水搭火車,打算去火炭體院教波時,喺上水站就畀港鐵職員叫停,話佢叫cue棍太長,長過規定嘅130cm,唔畀佢搭!仲要畀人抄低身份証,不過就唔使罰錢,警告吓啫!

陳國明將呢年事放咗上Facebook,提醒咁多位桌球迷,如果帶住支長過130cm嘅cue棍就唔好搭港鐵。同時亦都表示,明白港鐵職員只係執行職務,但希望港鐵可以重新審視同埋考慮放寬該條例,不然鍾意打桌球嘅市民就地鐵同火車都搭唔到,好唔方便。最重要係,佢下個月會帶隊上深圳比賽,八至九位19歲未夠嘅球手都未必搭到港鐵囉陰公!

陳國明Facebook有好多朋友支持,分別有人話「以後改用半截cue棍」、「咁都犯法」、「明正言順坐的士cam體院」等等,更有人直指港鐵公司「冇嘢搵嘢嚟做」,因為連單車拆咗轆都入得閘,點解cue棍唔得(順便奉勸大家,帶單車搭港鐵都盡量揀返非繁忙時間)。

其實今次事件發生,可能只係過時嘅條例之前未有被發現,就正如陳國明所講,職員都只係執行職務。不過,既然問題被發現,有關人士應該好好諗吓,呢條條例係唔係應該要改改呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載