蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月07日
馬上成為壹會員

【意興闌珊】發文鬧爆足總選教練 陳偉豪:有人怕麻煩

建立時間 (HKT): 0807 21:29

前港足代表、現任港超球隊夢想FC隊長陳偉豪,今日在個人FB發言,批評足總在遴選港足教練人選一拖再拖,對於早前傳出三名選候人包括中華台北教練韋特、甘巴爾、奇雲邦特,當中韋特是否適合執教港足有不同看法,他認為港足教練的主要職責是提升香港足球水平,而非幫香港足球的世界排名,所以他個人較喜歡熟悉本地足球的甘巴爾執教港足,而非傳媒傳出的韋特。偉豪又指出香港足球最大問題,是球圈多年來都未曾團結去做好一件事,他說﹕「有啲人唔想煩,有啲人怕麻煩,有心想去做好件事嘅人又俾人嫌佢麻鬼煩,所以我覺得,香港足球唔退步其實已經係一個好大嘅進步!」

相關新聞:【港超聯】三項盃賽仍未有贊助 梁芷珊:正積極物色

陳偉豪fb全文如下﹕
作為一個前港隊球員,我同各位香港球迷一樣都會留意香港隊嘅情況,大家近期最關注嘅當然係香港隊主教練嘅人選,根據傳媒報道,目前港隊主教練一職熱門人選係現時中華台北足球隊主教練韋特,我對呢位英籍嘅教練認識唔多,對佢嘅教波方式同球隊打法更加唔了解,只知道佢近年帶領中華台北係世界排名提高左不少,現時排名更高於香港,亦都曾經帶領關島係世界排名升到137位,就聘請港隊主教練一事我個人就有幾個觀點想同大家分享一下!

首先,前港隊教練kim sir 突然離職,短時間內好難搵到合適人選接替,所以主教練一職懸空左七個月有多,我覺得都可以理解,但用咗咁耐時間,接過超過百份申請,經過一輪篩選,再同九名合要求嘅教練進行視像會議,最後竟然係一位帶領中華台北和關島嘅教練係大熱人選?我好想知道其餘嘅應徵者平時係咪只係教開校隊或者區隊,定係人選一早内定,只係搵其他人返嚟陪跑呢?

相關新聞:【港超聯】友賽小勝夢想2:1 東方季前熱身賽三連勝

第二,對我哋足球員來講,提升實力比提升排名更加重要,印度排名比北韓高,唔通北韓嘅實力會比印度低咩?如果搵主教練嘅目的只係為咗提升香港足球嘅排名,而唔係想提高香港足球技術戰術水平的話,其實好簡單,只要搵多D同級或比較弱嘅對手踢比賽,我相信排名可能會比而家高,咁搵本地教練教都得啦,唔使咁煩!

第三,如果比我選擇,我會揀對香港足球有一定認識嘅教練,起碼唔使浪費時間去適應和重新建立默契,聽聞甘巴爾同奇雲邦特都有參與今次應徵,我個人會選擇甘巴爾做港隊主教練,因為佢嘅打法好適合香港球員, 同埋佢對香港球員嘅特性非常之了解,喺香港亦都取得成功,相信無人會懷疑佢教波嘅能力!

第四,香港足球最大嘅問題,就係球圈咁多年來都未試過團結去做好一件事,有啲人唔想煩,有啲人怕麻煩,有心想去做好件事嘅人又俾人嫌佢麻鬼煩,所以我覺得,香港足球唔退步其實已經係一個好大嘅進步黎!

我今日講咗好多野,其實有好多野都唔講得,自己知就算,最後總結,其實香港係有好多有心想搞好香港足球嘅人,但奈何到最後都只係換來四個字———意興闌「珊」。

--------------------
歐洲夢幻隊登場「BFB CHAMPIONS 2.0」!最強稀有度新球星機率7倍UP!立即下載 http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載